अलिमले पाए नयाँ जीवन, अनुहारमा रहेको पाँच किलोको ट्युमर शल्यक्रिया गरेर निकालियो

जनस्वास्थ्य सरोकार, ललितपुर । ललितपुरको हरिसिद्धिस्थित नेपाल क्यान्सर अस्पतालले एक जना बिरामीको अनुहारमा रहेको पाँच किलो २ सय ग्रामको ट्युमर निकालेको छ । धनुषाका ४२ वर्षिय अलिम कवाडीको १० घण्टाको शल्यक्रियापछि अनुहारमा रहेको ट्युमर निकालिएको अस्पतालका क्यान्सर रोग विशेषज्ञ डा. प्रभात चन्द्र ठाकुरले जानकारी दिए । मुखबाट ट्युमर निकाल्दा धेरै रगत बगेको भएपनि अहिले बिरामीको अवस्था समान्य रहेको र प्रत्यारोपण गरिएको मासु पनि सामान्य रहेको डा. ठाकुरले बताएका छन् । अलिमको अनुहारमा वि. सं. २०७१ सालमै ट्युमर देखिएको थियो । त्यतिवेला उनले वीरअस्पतालमा शल्यक्रिया गराएका थिए । शल्यक्रिया सफल भएको थियो । उनको आर्थिक अवस्था कमजोर भएका कारण नियमित फलोअपका लागि उनी काठमाडौँ आइरहन सकेनन् । जसले गर्दा शल्यक्रिया भएको तिन वर्ष पछि पुनः ट्युमर पलाउन सुरु भयो । ट्युमर दिनानुदिन बढ्न थाल्यो । उनलाई खानेकुरा खान र श्वास फेर्न समेत गाह्रो हुन थाल्यो । ट्युमरले आँखाको भागलाई थिच्यो जसले गर्दा उनको दायाँ आँखाको ज्योती  गुम्न पुग्यो । ट्युमरले जटिल रुप लिइसकेको थियो । उनका दाजुभाउजुले केही चन्दा संकलन गरेर  उपचारका लागि काठमाडौँ ल्याए । उनलाई वीर अस्पतालमा भर्ना गरियो । अस्पतालले अलिमलाई निःशुल्क शैय्या र औषधिको व्यवस्था गरिदियो । तर पैसाको अभावले उनका दाजुभाउजु भने पेटीमै सुत्नुपर्यो । समस्या जटिल भएकाले प्राविधिक समस्याका कारण वीर अस्पतालमा अलिमको शल्यक्रिया सम्भव नहुने भयो । उपचारमा संलग्न चिकित्सक डा. प्रविण जयसवालले नेपाल क्यान्सर अस्पतालका क्यान्सर रोग विशेषज्ञ डा. ठाकुरलाई अलिमको केसबारे जानकारी गराए । डा. ठाकुरले सबै रिपोर्टहरु हेरे । सिटी स्क्यानको रिपोर्ट हेर्दा ट्युमर धेरै नै फैलिसकेको अवस्था  थियो । ट्युमरले पिनास, तालु, दायाँ आँखा र नाकको हड्डीलाई थिचिसकेको थियो । रगतको नशाहरु धेरै फैलिसकेका थिए । जसले शल्यक्रिया गर्दा धेरै रक्तश्राव हुन सक्ने जोखिम रहन्थ्यो । सबै स्वास्थ्य परिक्षण गरियो । वीर अस्पतालको रिर्पोटमा लो ग्रेट अस्टियोसार्कोमा भनिएको थियो । तर एकिन भने थिएन । यो हड्डीबाट पलाउने एक किसिमको ट्युमर हो । फाल्गुन २१ बुधबार डा. ठाकुर र डा. जयसवाल, डा. सुरेन्द्र बस्नेत र डा. कृष्ण नगरकोटी लगायतको चिकित्सकीय टीमले अलिमको शल्यक्रिया गरेका थिए । शल्यक्रिया गर्न करिब १० घण्टा समय लाग्यो । ‘पिनास, तालु, आँखा र नाकको हड्डीको आधा भाग काटेर निकाल्नुपर्यो । सबैभन्दा जटिल पक्ष भनेकै  घाउ पुर्नु थियो ।’ डा. ठाकुर भन्छन् –‘खाल्टा भर्नका लागि खुट्टाको मासु र छाला प्रत्यारोपण गरियो ।’ शल्यक्रिया गरेको आज ६ दिन बितिसकेको छ । उनी अहिले विस्तारै बोल्न सक्ने भएका छन् । बायाँ आँखाले हेर्न सक्छन् । खाना खान सक्छ । डा. ठाकुर भन्छन् –‘अलिमले पुर्नजन्म पाएका छन् । ’ बायोप्सी रिपोर्ट आइसकेपछि मात्र अस्टियोसार्कोमा भएन/भएको थाहा हुने डा. ठाकरको भनाइ छ । उनका अनुसार अस्टियोसार्कोमा भए किमोथेरापी या रेडियोथेरापी दिनुपर्दछ । रिपोर्ट आउन २ हप्ता समय लाग्छ । नेपाल क्यान्सर अस्पतालले अलिम शल्यक्रिया निःशुल्क गरिदिएको छ । सरकारबाट पाउने १ लाखले औषधि र सामान खरिद गरिएको अस्पतालले जनाएको छ । त्यस्तै चन्दा संकलनबाट १ लाख ७१ हजार ५ यस संकलन भएको अस्पतालका कार्यकारी निर्देशक स्वरुपा श्रेष्ठले जानकारी दिइन ।