सेनेटरी प्याडले छात्राको नियमितता वृद्धि

जनस्वास्थ्य सरोकार, मार्तडी  । बूढीगङ्गा नगरपालिका–४ स्थित कोटबाडाकी १४ वर्षीया स्वस्तिका नेपाली ८ कक्षामा नियमित अध्ययन गर्ने छात्रा हुनुहुन्छ । उहाँलाई पहिलोपटक महिनावारी हुँदा गाउँ नजीकै रहेको विद्यालयमा जाने कि नजाने गए पनि कसरी कक्षामा बस्ने र पढ्ने भन्ने चिन्ताले सतायो । पहिलोपटक महिनावारी हुँदा स्वस्तिकासँगै विद्यालय जाने र महिनावारी भएका किशोरीलाई सधैँ समस्या हुने गरेको थियो । अहिले यहाँका विद्यालयमा अध्ययनरत किशोरीलाई महिनावारी हुँदा चिन्ता घटेको छ । “पहिले महिनावारी भएका बेला महिनामा तीन–चार दिन स्कूल आउँदैनथ्यौँ”, नेपालीले भन्नुभयो, “महिनावारी भएका बेला विद्यालयमा मानसिक तनावले पढ्ने अवस्था नै हुँदैनथ्यो, अहिले त सजिलो छ स्कूल छोड्नु परेको छैन ।” नेपाली जस्तै सोही कक्षामा अध्ययनरत छात्रा सङ्गीता रावतले महिनावारी भएका समयमा विद्यालयमा समस्या झेल्दै डरैडरले अध्ययन गर्दै आउनुभयो । पछिल्लो समय विद्यालयमा निःशुल्क सेनेटरी प्याड दिएपछि महिनावारी हुँदा भोग्नुपर्ने समस्या हटेको खुशी उहाँले सुनाउनुभयो । छात्रा महिनावारी भएको बेला शारीरिक समस्या हुने र पठनपाठनमै समेत असर पर्नाका साथै मानसिकरुपमा तनाव भोग्नुपर्ने अवस्था रहेको राजेन्द्र आधारभूत विद्यालयका शिक्षिका प्रभु शाहले बताउनुभयो । उहाँले महिनावारीको समयमा छात्राहरु विद्यालय नै नआउने आए पनि कक्षा छाडेर घर फर्किने गरेका गुनासो गर्नुभयो । अहिले विद्यालयमा छात्राका लागि निःशुल्क सेनेटरी प्याड वितरण हुने गरेकाले महिनावारी भएका बेलामा पनि छात्राले विद्यालयमा नियमितता दिएका उहाँले बताउनुभयो । महिनावारी भएका बेला छात्राका लागि सेनेटरी प्याड, महिनावारी हुँदा हुने समस्याका लागि आवश्यक औषधि, विद्यालयमै बिरामी हुँदा आरामकक्षको व्यवस्था र महिनावारी हुँदा नियमित सरसफाइमा ध्यान दिनुपर्छ भनेर विद्यालयले विभिन्न जनचेतना जगाउँदै आएको छ । विद्यालयमा महिनावारी हुने छात्राका लागि सेनेटरी प्याडदेखि लिएर सरसफाइका सबै सामग्री विद्यालयले उपलब्ध गराएपछि महिनावारी भएका बेला छात्राको विद्यालयमा नियमितता बढेको राजेन्द्र निम्न माविका प्रधानाध्यापक नृगसिंह नेपालीले बताउनुभयो । पछिल्लो समय महिनावारी भएका छात्राले सहजै रुपमा विद्यालयमा राखिएका सेनेटरी प्याड माग्ने गरेको थुमा माविका प्रधानाध्यापक पूर्ण खातीले बताउनुभयो ।रासस