कोरोनाको आशंकामा ४ सय ५० जनाले गराए नमुना परीक्षण , पोजेटिभ १ जनामा मात्रै

जनस्वास्थ्य सरोकार, काठमाडौँ । सरकारले नेपालमा अहिलेसम्म कोरोनाको आशंकामा नमुना परीक्षण गराइएका ४ सय ५० मध्ये हालसम्म १ जनामा मात्रै पोजेटिभ देखिएको भएतापनि निको भएर घर फर्किसकेको स्वास्थ्य मन्त्रालय जनाएको छ । बिहीबार स्वास्थ्य मन्त्रालयमा आयोजित पत्रकार सम्मेलनमा मन्त्रालयका प्रवक्ता डा. विकास देवकोटाले कोरोनाको आशंकामा हाल ६ जनालाई आइसोलेसनमा राखिएको जानकारी दिनुभयो । उहाँको भनाई अनुसार ४ जनालाई शुक्रराज ट्रपिकल सरुवा रोग अस्पताल टेकु र २ जनालाई पाटन अस्पतालको आइसोलेसन वार्डमा राखिएको छ । यस्तै, सिभिल अस्पतलबाट पनि कोरोनाको आशंकमा एक जना बिरामीको नमुना आएको तर परीक्षण भइनसकेको मन्त्रालयले जनाएको छ । स्वास्थ्य सचिव यादव कोइरालाले मन्त्रालयले विश्व स्वास्थ्य संगठनको मापदण्ड अनुसार काम गरिरहेको बताउनुभयो । उहाँले स्वास्थ्य र शिक्षा गम्भीर कुरा भएकाले सही सूचना प्रवाह गर्न आग्रह गर्नुभयो । उहाँले भन्नुभयो –‘अहिले हामी जोखिमलाई हेरेर काम गरिरहेको छौं। नाकाहरुमा कडाई गरेका छौं। स्थानीय र प्रदेश सरकासँग हातेमालो गरेका छौँ।’