कोभिड-१९ विरुद्धको लडाईमा हातेमालो- जनता र सरकारको साथमा काठमाडौं मेडिकल कलेज

जनस्वास्थ्य सरोकार, काठमाडौं । विश्वभर महामारीको रुपमा फैलिरहेको कोरोना भाईरस (कोभिड—१९) विरुद्धको लडाईमा काठमाडौ मेडिकल कलेज शिक्षण अस्पताल (केएमसी) नेपाल सरकार र जोखिममा रहेका नेपाली जनतालाई आवश्यक सहयोग गर्न प्रतिवद्ध रहेको छ । कोभिड—१९ महामारीको रोकथाम तथा नियन्त्रणमा कलेज व्यवस्थापनले आफ्नै पहलमा महत्वपूर्ण तयारी गरेको कलेजकी प्रमुख कार्यकारी अधिकृत एवं प्रिन्सिपल प्रा.डा. चन्दा कार्कीले जनस्वास्थ्य सरोकारलाई जानकारी दिनुभयो । काठमाडौंको सिनामंगल र भक्तपुर जिल्लाको दुवाकोमा रहेका कलेजको अस्पतालमा ज्वरो क्लिनिक सञ्चालन गरिएको छ ।

शंकास्पद बिरामीहरु आएमा अस्पताल मै आईसोलेसनमा राख्न पहिलो चरणमा ७ वेडको कोरोना आईसोलेसन क्यूबिकल वार्ड, १० बेडको कोरोना केयर वार्ड तथा ३ वटा भेन्टिलेटर सहित कोरोना केयर आईसियू बेडको स्थापना गरेको छ । कलेजले अस्पतालमा कोभिड-१९ को व्यस्थापनको लागी टास्क फोर्स गठन गरेको छ । सर्वसाधारणहरुले आफूलाई शंका लागेमा ज्वरो क्लिनिकमा गई वा फोनवाट समेत आवश्यक जानकारी लिन सकिने व्यवस्था मिलाइएको छ ।

काठमाडौं मेडिकल कलेजले सरकारको सहयोग पाएमा दुवाकोट अस्पतालमा २२ वटा तयारी अवस्थाको क्याबिन, १०० साधारण शैया (५० वटा आईसोलेसन र ५० वटा कोभिड शैया), ५ वटा भेन्टिलेटर सहित १० वटा आईसियू संचालन गर्ने योजना गरेको जानकारी गराएको छ ।

भविश्यमा अस्पतालका सम्पूर्ण वेडहरु कोरोना उपचारमा प्रयोग गर्न परेमा पनि सरकारलाई सहयोग गर्न काठमाडौं मेडिकल कलेज तयार रहेको प्रा.डा. कार्कीले जानकारी गराउनुभयो । यसका लागि केएमसी व्यवस्थापनले स्वास्थ्य तथा जनसंख्या मन्त्रालय तथा भक्तपुरको स्थानीय सरकारलाई पत्राचार गरिसकेको छ ।

यो महामारी वाहेक अन्य कारणले विरामी भई आकस्मीक सेवा लिन पर्ने भएमा शल्यकृया सहित सम्पूर्ण आकस्मीक सेवाहरु, आईसियू लगायतका अन्तरङ्ग सेवाहरु पूर्ववत रुपमा नै सञ्चालन गरिएको छ । सर्वसाधारण जनतालाई स्वास्थ्य सम्बन्धि केही समस्या आई घरवाट नै परामर्श लिनुपरेमा अस्पतालले सुविधा उपलब्ध गराएको छ भने सम्बन्धित चिकित्सकहरुको नाम, टेलिफोन नम्बर, बार र समय फेसबुक लगायतका सामाजिक सञ्जाल एवं मिडियाहरुमार्फत जानकारी गराइएको प्रा.डा. कार्कीले बताउनुभयो । अकस्मात ज्वरो आई अस्तालमा आउनुभएका वा कोरोनाको शंका लागेर आउनुभएका वा अन्य कुनै कारण स्वास्थ्य सम्बन्धित आकस्मिक समस्या आई आकस्मीक सेवा लिनु परेका विरामीलाई प्रोटोकल बमोजिम सेवा दिइहेको र घरवाटै विशेषज्ञ चिकित्सकहरु सँग आफ्नो समस्याको बारे लकडाउन अवधिमा परामर्श पाउन सक्ने सुविधा पनि थप गरी बिरामीहरुलाई सेवा उपल्ध भइरहेको अस्पतालका मेडिकल डाईरेक्टर प्रा. डा. मुकुन्द राज जोशीले जानकारी गराउनुभयो । यस घातक कोरोना भाईरस विरुद्ध लड्न तिनै तहका सरकार र स्वास्थ्य तथा जनसंख्या मन्त्रालय एवं सरोकारवाला निकाय र सर्वसाधारणहरुलाई आवश्यक सहयोग गर्न यस कलेज व्यवस्थापक, चिकित्सक तथा कर्मचारीहरु प्रतिवद्ध रहेको कलेजकी कार्र्यकारी प्रमुख प्रा.डा. कार्कीले स्पष्ट पार्नुभयो ।