खुशीको खबर ! मुलुकमा एकसातादेखि कोरोना भेटिएनन्, बीर र शुक्रराज हस्पिटलबाट पनि परीक्षण सुविधा

जनस्वास्थ्य सरोकार, काठमाडौं । सरकारले काठमाडौंको वीर अस्पताल र टेकुस्थित शहीद शुक्रराज ट्रपिकल सरुवा रोग अस्पतालबाट पनि कोरोना भाइरस (कोभिड—१९) परीक्षणको सुविधा उपलब्ध गराएको छ ।

बीर अस्पतालमा परीक्षण शुरु भइसकेको छ भने टेकुमा भोलिदेखि शुरु हुने स्वास्थ्य मन्त्रालयका प्रवक्ता डा. विकास देवकोटाले बताउनुभयो ।

यसअघि राष्ट्रिय जनस्वास्थ्य प्रयोगशालामा कोभिड १९ को परीक्षण हुँदै आएको थियो । अब उपत्यकामा ३ ठाउँबाट कोरोना परीक्षण सेवा उपलब्ध भएको छ । उपत्यका बाहिर कोसी अञ्चल अस्पताल बिराटनगर, बी.पी कोइराला स्वास्थ्य विज्ञान प्रतिष्ठान धरान, जनकपुर प्रादेशिक अस्पताल, पोखरा स्वास्थ्य विज्ञान प्रतिष्ठान, सुर्खेत प्रादेशिक अस्पताल, सेती प्रादेशिक अस्पताल धनगढी, हेटौडा, भैरहवा र चितवनलगायत ठाउँबाट नमुना परीक्षण भइरहेको छ ।

पछिल्लो एक सातादेखि मुलुकमा नयाँ कोरोना संक्रमण भेटिएको छैन । हालसम्म मुलुकभर भएका ४ हजार ४ सय २६ जनाको नमुना परीक्षणमा सबैको नतिजा नेगेटिभ पाइएको छ ।

स्वास्थ्य तथा जनसंख्या मन्त्रालयद्वारा आयोजित नियमित मिडिया ब्रिफिङ कार्यक्रममा प्रवक्ता देवकोटाले दिनहुँ परीक्षणको संख्या बढिरहेको र सात दिनयता गरिएको परीक्षणमा सबैको रिपोर्ट नेगेटिभ आएको जानकारी गराउनुभयो । कोरोना संक्रमितको आशंका गरिएको ८२ जना व्यक्तिहरुलाई आइसोलेसनमा राखिएको छ । जसमध्ये उपत्यकामा १५ र उपत्यका बाहिर ६७ जना रहेका छन् । मुलुकभर गरी ८ हजार ८२ जना व्यक्ति क्वारेन्टाइनमा रहेका छन् । गत २४ घण्टामा मुलुकभर ८९७ नमुना परीक्षण भएका छन् ।