बीरगञ्जको जामे मस्जिदमा बस्दै आएका ३ जना भारतीय नागरिकमा कोरोना संक्रमण

जनस्वास्थ्य सरोकार, काठमाडौं । नेपालमा तीन जना भारतीय नागरिकको स्वाब नमुना परीक्षण गर्दा कोरोना भाइरस (कोभिड १९) पुष्टी भएको छ । यससँगै अब नेपालमा कोरोना संक्रमित भएका व्यक्तिहरुको संख्या ११ पुगेको छ ।

बीरगञ्जको छपकैयाँस्थित श्रीराम हल अगाडिको जामे मस्जिद र घुसुकपुर मस्जिदमा बस्दै आएका २४ जना धार्मिक गुरु र अन्यगरी जम्मा ३३ जनाको हेटौंडा प्रयोगशालामा शुक्रबार नमुना परीक्षण गर्दा ३ जना भारतीय नागरिकमा कोरोनाको प्रारम्भिक लक्षण मिश्रित पाइएको थियो । यसलाई पुनः एकिन गर्न काठमाडौंस्थित राष्ट्रिय जनस्वास्थ्य प्रयोगशालामा नमुना पठाइएकोमा यहाँबाट पनि ३ जनामा कोरोना संक्रमण पुष्टी भएको नतिजा आएको थियो ।

मस्जिदका २४ जना धार्मिक गुरु नारायणी क्षेत्रीय अस्पतालमा ‘स्क्रिनिङ’का लागि पुगेका थिए । कोरोना नतिजा पोजेटिभ आएपछि ती तीन जनालाई अस्पतालको आइसोलेसनमा राखिएको छ भने अन्य २१ धर्मप्रचारकहरुलाई पनि स्थानीय सिद्धार्थ मावीको क्वारेन्टाइनमा सारिएको छ । संक्रमण पुष्टि भएकामध्ये २ जना उत्तरप्रदेश र एक जना दिल्लीमा बस्दै आएका छन् । उनीहरु १३ दिनदेखि वीरगञ्ज–२ छपकैयास्थित जामे मस्जिदमा आएको स्थानीयले बताएका छन् ।

सप्तरीमा आयोजित मुस्लिम धार्मिक सभामा सहभागी हुन आएका उनीहरु त्यही बेलादेखि भारत फर्केका छैनन् । मार्च ४ तारिखमा रिटर्न ट्रेन टिकेट भए पनि लकडाउनका कारण उनीहरु रोकिएका थिए ।

लकडाउन खुलेपछि घर फर्कन भनी उनीहरुले १५ अप्रिलका लागि टिकट काटेका छन् । घर फर्कनुअघि एकपटक स्वास्थ्य जाँच गराउनु उपयुक्त सम्झेर उनीहरु आफैं नारायणी अस्पतालमा पुगेको बताइएको छ । स्वास्थ्य मन्त्रालयले यो नतिजा सार्वजनिक गर्ने तयारी गरिहरेको छ । कोरोना पोजेटिभको सुचना पुगेपछि संक्रमितहरुलाई राखिएको वीरगन्जस्थित नारायणी क्षेत्रीय अस्पतालमा इमर्जेन्सी बाहेकका अन्य सेवाहरु बन्द गरिएको छ ।