सनसिटी अपार्टमेन्ट: २ जनामा पिसिआर परीक्षण नतिजा पोजेटिभ, मुलुकमा कोरोना संक्रमितको संख्या १६

जनस्वास्थ्य सरोकार, काठमाडौं । काठमाडौंको पेप्सीकोलास्थित सनसिटी अपार्टमेन्टमा बस्दै आएका कोरोना भाइरस (कोभिड— १९) का शंकास्पद तीन जनामध्ये २ जनामा पिसिआर परीक्षण नतिजा पोजेटिभ देखिएको छ ।

स्वास्थ्य मन्त्रालय स्रोतका अनुसार, राष्ट्रिय जनस्वास्थ्य प्रयोगशाला टेकुमा ५८ वर्षका छोरा र ५६ वर्षीया बुहारीमा कोभिड—१९ को कोरोना परीक्षण गर्दा नतिजा पोजेटिभ आएको पुष्टि भएको हो । ८१ वर्षीया वृद्धा आमाको भने नतिजा आउन बाँकी छ ।

बेलायतबाट फर्केर काठमाडौंमा बसेका उनीहरुको र्यापिड टेस्ट पोजेटिभ देखिएपछि सोमबार पाटन अस्पतालको आइसुलेसनमा लगिएको थियो ।  अहिले अपार्टमेन्ट वरपर पूर्ण रूपमा आवतजावत ठप्प पारिएको छ । अपार्टमेर्टमा करिब ५ सय परिवार बस्दै आएका छन् । यो सँगै अब नेपालमा कोरोना सं क्रमितहरुको संख्या १६ पुगेको छ ।