राजधानीमा कोरोना देखिएसँगै सुरक्षा व्यवस्थामा कडाइ

जनस्वास्थ्य सरोकार, काठमाडौं । राजधानीमा कोरोना संक्रमण देखिएसँगै सरकारले सुरक्षा व्यवस्थामा कडाइ गरेको छ ।

काठमाडौं उपत्यकाभित्र सरकारले लगाएको लकडाउन आदेशको अवज्ञा गर्ने २ हजार ४ सय २७ भन्दा बढी व्यक्ति आज कारबाहीमा परेका छन् ।

लकडाउनको उलंघन गर्ने सबैभन्दा धेरै काठमाडौं जिल्लाका रहेका छन् । महानगरीय प्रहरी कार्यालय काठमाडौंका अनुसार, काठमाडौं जिल्लामा २ हजार १९ जना कारबाहीमा परेका छन् । यसैगरी ललितपुरबाट ३९८ जना, भक्तपुरबाट १० जनाले कारबाहीको सामना गरे ।

कारबाही स्वरुप उनीहरुलाई ३ घण्टा बाटोमानै होल्ड गरिएको छ । बिहान बेलुका तरकारी किन्न र फ्रेस हुने बहानामा सडकमा आउने प्रवृत्ति बढेपछि प्रहरीले अभियान थालेको हो ।

यसैगरी प्रहरीले लकडाउनको अवज्ञा गर्ने ३२० वटा दुई पांग्रे सवारी साधन (मोटरसाइकल, स्कुटर आदि) र ५० वटा चारपांग्रे सवारी साधनलाई नियन्त्रणमा लिएको छ ।