बागलुङकी ६५ वर्षीया आमाले पनि जितिन् कोरोना भाइरस

जनस्वास्थ्य सरोकार, बागलुङ । कोरोना संक्रमित बागलुङकी ६५ बर्षीया महिला कोरोना भाइरस (कोभिड १९) निको भएर ३ हप्ता लामो बसाइपछि अस्पतालबाट डिस्चार्ज हुनुभएको छ । तर उहाँले दुई हप्ता घरमै क्वारेन्टाइनमा बस्नुपर्ने छ ।

२४ घण्टाभित्र गरिएको दोस्रो स्वाव परीक्षणमा कोभिड १९ को नतिजा नेगेटिभ आएपछि उहाँलाई धौलागिरी अञ्चल अस्पतालको आइसोलेसन वार्डबाट डिस्चार्ज गरिएको हो ।

शनिबार पोखराको प्रदेश जनस्वास्थ्य प्रयोगशालामा पीसीआर मेसिनमा परीक्षण गर्दा कोरोना रिपोर्ट नेगेटिभ आएको थियो । यसअघि ३ गते गरिएको स्वाव परीक्षणमा पनि नेगेटिभ रिपोर्ट आएको थियो । कोरोना जितेर घर फर्केकी महिलामा दम र उच्च रक्तचापको समस्या थियो । उहाँले अस्पतालमा दम र उच्च रक्तचापको नियमित औषधि सेवन गर्नुभएको थियो । घर फर्किन पाएकोमा खुशी व्यक्त गर्दै उहाँले अस्पतालका चिकित्सक, नर्सलगायतका सम्पूर्ण स्वास्थ्यकर्मीहरुको माया र आफ्नो आत्मविश्वासले रोगलाई जितेर घर फर्किन सफल भएको बताउनुभयो । गत चैत ४ गते कतार एयरवेजको फ्लाइटमा काठमाडौ उत्रिएर बाग्लुङ आइपुगेकी उहाँमा कोरोना संक्रमण देखिएको थियो । उहाँ बेल्जियमबाट कतार हुँदै नेपाल आएकी आउनुभएको थियो । कतारदेखि काठमाडौं र काठमाडौंदेखि पोखरा हुँदै बागलुङस्थित घर आउने बेलासम्म नेपालकै पाँचौ संक्रमित १९ बर्षकी युवती र उहाँ सँगै हुनुहुन्थ्यो । ती युवती भने धौलागिरी अञ्चल अस्पतालमा उपचार गराइरहनुभएको छ । उनको चौथो पटक सम्मको स्वाब परीक्षण पोजेटिभ आएको छ ।