धनगढीका ३४ वर्षीया एक युवाले पनि जिते कोरोना, यो सँगै निको हुनेको संख्या ५ पुग्यो

जनस्वास्थ्य सरोकार, धनगढी । धनगढीका ३४ वर्षीय एक युवाले पनि कोरोना जितेका छन् । यो सँगै मुलुकमा कोरोना निको हुनेहरुको संख्या ५ पुगेको छ । धनगढीस्थित सेति प्रादेशिक अस्पतालमा उपचाररत कोरोना संक्रमित ति युवा निको भएर २९ दिनपछि घर फर्केका हुन् । उनको घर धनगढी उपमहानगरपालिका– ५ हो ।

सेती अञ्चल अस्पतालका प्रवक्ता डा. जगदिश जोशीका अनुसार, ति युवाको पछिल्लो २ पटक गरिएको कोरोना परीक्षण रिपोर्ट नेगेटिभ आएपछि मंगलबार घर पठाइएको हो ।

उनी चैत ७ गते दुवईबाट भारतको राजधानी दिल्ली हुँदै काठमाडौंबाट नेपालगञ्ज जहाजमा र त्यसपछि बस, अटोरिक्सा हुँदै चैत ८ गते धनगढीस्थित आफ्नो घर पुगेका थिए । दुवईमा पनि बिरामी परेका उनलाई कोरोनाको जस्तै लक्षण देखिएपछि चैत ११ गते सेती प्रादेशीक अस्पताल भर्ना गरिएको थियो । उनको थ्रोट स्वाबको रिपोर्ट चैत १४ गते पोजिटिभ आएपछि उनलाई सेती प्रादेशीक अस्पतालको आइसोलेसनमा राखिएको थियो ।