एकैदिन दुईजनाले जिते कोरोना, यो सँगै मुलुकमा कोरोना निको हुनेको संख्या ७ पुग्यो

जनस्वास्थ्य सरोकार काठमाडौं । मुलुकमा कोरोना संक्रमित दुईजना व्यक्ति निको भएर एकैदिन अस्पतालबाट डिस्चार्ज भएका छन् । यो सँगै मुलुकमा कारोना निको हुने व्यक्तिहरुको संख्या ७ पुगेको छ ।

स्वास्थ्य मन्त्रालयका अनुसार, टेकुस्थित शुक्रराज ट्रपिकल तथा सरुवा रोग अस्पतालमा उपचार गराइरहेका धादिङका ३४ वर्षीय युवक र सेती अञ्चल अस्पतालमा उपचार गराइरहेका कञ्चनपुरका ४० वर्षीय पुरुष निको भएर बुधबार घर फर्किएका हुन् ।

धादिङका युवक चैत ६ गते १६० यात्रु बोकेको एयर अरेबियाको उडान नम्बर जी ९५३७ विमानमा नेपाल आएका थिए । पीसीआर परीक्षका क्रममा कोरोना पुष्टि भएपछि उनलाई चैत १२ गते अस्पताल भर्ना गरिएको थियो । उपचारका क्रममा पछिल्ला रिपोर्टहरु नेगेटिभ आएपछि अस्पतालले डिस्चार्ज गरेको हो । यसैगरी सेति अञ्चल अस्पतालमा उपचारत कञ्चनपुरको वेदकोट नगरपालिका घर भएका कोरोना संक्रमित ४१ वर्षीय युवकको दुईपटक गरिएको कोरोना परीक्षणको रिपोर्ट लगातार निगेटिभ आएपछि उनलाई अस्पतालले डिस्चार्ज गरेको हो । उनी चैत १३ गते भारतको उत्तराखण्ड राज्यको चम्पावत जिल्लाको सल्ली भन्ने स्थानबाट कञ्चनपुरको ब्रम्हदेवको बाटो हुँदै लुकेर नेपाल पसेका थिए । उनलाई सोही दिन सशस्त्र प्रहरीले क्वारेन्टाइनमा राखेको थियो। चम्पावतबाट हिँडेर आएका उनीसहितका ७ जना ट्युब प्रयोग गरेर नेपाल छिरेका थिए । ब्रम्हदेवको बाटो महेन्द्रनगरतिर आइरहेका उनीहरुलाई सशस्त्र प्रहरीले समातेर बेदकोट नगरपालिकामा रहेको कृषि पाइलट फार्मको छात्रबासमा बनाइएको क्वारेन्टाइनमा राखेको थियो । चैत २२ गते स्वाबको रिपोर्ट पोजिटिभ आएपछि उनलाई सेती अञ्चल अस्पतालको आइसुलेशन वार्डमा भर्ना गरिएको थियो । उनीसँगै कोरोना पोजिटिभ देखिएका कैलालीको लम्कीका युवक आइतबार नै डिस्चार्ज भइसकेका छन् । सेती प्रादेशिक अस्पतालमा अब धनगढीकी महिला र कैलालीको लम्कीचुहा नगरपालिकाकी ६५ वर्षिया महिला गरी २ जना विरामी उपचाररत छन् ।

हाल मुलुकमा ४५ जना कोरोना संक्रमित भएका छन् । निको भएर घर फर्केका ७ जना बाहेक अन्य ३८ जनाको मुलुकका विभिन्न अस्पतालहरुमा उपचार भइरहेको छ ।