मुलुकमा कोरोना संक्रमित १० जना निको भए, ३८ जना उपचाररत

जनस्वास्थ्य सरोकार । नेपालमा एकैदिन ३ जना कोरोना संक्रमित निको भएर घर फर्किएका छन् । यो सँगै कोरोना निको हुनेहरुको संख्या १० पुगेको छ । बिहीबार ललितपुरको पाटन अस्पतालमा उपचार दुईजना कोरोना जितेर डिस्चार्ज भए । पाटन अस्पतालमा उपचाररत कागेश्वरी मनोहरा नगरपालिका ९ पेप्सिकोलास्थित सनसिटी अपार्टमेन्टमा बस्दै आएका ५८ वर्षीय पुरुष र ८१ वर्षीय महिला स्वास्थ्य लाभ गरी डिस्चार्ज भएको स्वास्थ्य मन्त्रालयले जनाएको छ । उनीहरु चैत्र ५ गते बेलायतबाट काठमाडौं आएका थिए । त्यसैगरी बिहीबार नै धनगढीको सेती अस्पतालमा उपचार गराइरहेकी ६५ वर्षीया महिलासमेत ११ दिन उपचार गराएर डिस्चार्ज भइन् ।

हालसम्म डिस्चार्ज हुनेमा काठमाडौंका ३ जना, धादिङका १, बागलुङका १ र धनगढीका चारजना रहेका छन् । एकजना फागुन महिनातिर नै निको भएर घर फर्किसकेका छन् ।

हाल देशभर संक्रमित ४८ जनामध्ये १० निको भए भने ३८ जनाको देशका विभिन्न अस्पतालहरुमा उपचार भइरहेको छ ।