कोरोना निको हुने विश्वका सबै देशमध्ये जर्मनी अगाडि, अमेरिका विश्वमा सबैभन्दा बढी कोरोना प्रभावित देश, चीन पुग्यो नवौं स्थानमा

जनस्वास्थ्य सरोकार, अमेरिका । अमेरिका विश्वमा सबैभन्दा बढी कोरोना प्रभावित देश हो । अमेरिकाको जोन्स हप्किन्स विश्वविद्यालयका अनुसार, संयुक्त राज्य अमेरिकामा कोरोनाबाट मर्नेहरुको संख्या ४९ हजार ८४५ पुगेको छ । यो समाचार तयार पार्दासम्म अमेरिकामा ८ लाख ८० हजार २०४ जना संक्रमित भइसकेका छन् । अमेरिकामा संक्रमितमध्ये ८५ हजार ९२२ निको भएका छन् । यसैगरी स्पेशनमा संक्रमित भएका २ लाख १३ हजार २४ जनामध्ये २२ हजार १५७ को ज्यान गएको र ८९ हजार २५० जना निको भएका छन् । इटलीमा कोरोनाबाट २५ हजार ५४९ जनाले ज्यान गुमाएका छन् । इटलीमा १ लाख ८९ हजार ९७३ जना संक्रमितमध्ये ५७ हजार ५७६ निको भएका छन् । यसैगरी फ्रान्समा कोरोनाबाट ज्यान गुमाउनेको संख्या २१ हजार ८५६ पुगेको छ । फ्रान्समा कोरोना संक्रमित १ लाख ५८ हजार १८३ मध्ये ४२ हजार ८८ जना निको भएका छन् ।

जर्मनीमा कोरोनाबाट मर्नेहरुको संख्या ५ हजार ५७५ रहेको छ । संक्रमितको तुलनामा यहाँ मर्नेको संख्या कम हो । जर्मनीमा संक्रमित भएका १ लाख ५३ हजार १२९ मध्ये १ लाख ३ हजार ३०० निको भएका छन् । कोरोना निको हुने विश्वका सबै देशमध्ये जर्मनी अगाडि रहेको छ ।

यसैगरी बेलायतमा १ लाख ३८ हजार ७८ जनामध्ये १८ हजार ७३८ जनाले ज्यान गुमाएका छन् । टर्कीमा कोरोनाबाट ज्यान गुमाउनेको संख्या २ हजार ४९१ रहेको छ । टर्कीमा कोरोना संक्रमित १ लाख १ हजार ७९० मध्ये १८ हजार ४९१ जना निको भएका छन् । इरानमा ८७ हजार २६ जना कोरोना संक्रमितमध्ये ५ हजार ४८१ ले ज्यान गुमाएका छन् भने ६४ हजार ८४३ निको हुन सफल भएका छन् ।

यतिखेर चीन कोरोना संक्रमितको दृष्टिकोणबाट नवौं स्थानमा पुगेको छ । चीनमा ८२ हजार ८०४ जना कोरोना संक्रमितमध्ये ४ हजार ६३२ को ज्यान गएको छ भने ७७ हजार २५७ निको भएर घर फर्किसकेका छन् ।