मुलुकमा कोरोना निको हुनेहरुको संख्या १२ पुग्यो, ३७ जनाको विभिन्न अस्पतालमा उपचार

जनस्वास्थ्य सरोकार, काठमाडौं । चितवनमा उपचाररत २७ वर्षीय युवाले पनि कोरोना जितेका छन् ।

स्वास्थ्य मन्त्रालयका अनुसार, उनको आठ दिनमै कोरोना परीक्षणको दुईवटा रिपोर्ट निगेटिभ आएपछि उनलाई अस्पतालबाट डिस्चार्ज गरिएको हो । यो सँगै मुलुकमा कोरोना निको भएर डिस्चार्ज हुनेहरुको संख्या १२ पुगेको छ ।

मन्त्रालयका अनुसार, अहिलेसम्म आरडीटी विधिबाट ३९ हजार ६ सय ७० र पीसीआर विधिबाट ९ हजार ६ सय ६६ जनाको गरेर जम्मा ४९ हजार तीन सय ३६ जनामा कोरोना परीक्षण गरिएको छ । मन्त्रालयका अनुसार, अहिले कोभिड —१९ संक्रमित ३७ जनाको विभिन्न अस्पतालमा उपचार भइरहेको छ । यीमध्ये प्रदेश नम्बर १ को राजधानी विराटनगरस्थित कोशी अस्पतालमा ३० जनाको उपचार भइरहेको छ । अन्य संक्रमितमध्ये पाँच जनाको वीरगञ्ज, धनगढी र भरतपुरमा एकएक जनाको उपचार भइरहेको छ । उनीहरुको स्वास्थ्यवस्था सामान्य रहेको मन्त्रालय प्रवक्ता डा. विकास देवकोटाले जानकारी दिनुभयो । अहिलेसम्म क्वारेन्टाइनमा १४ हजार सात सय ३१ जना रहेका छन् जसमध्ये सबैभन्दा बढी सात हजार बढी सुदूरपश्चिममा छन् । उपत्यकामा ३ र बाहिर ८४ गरेर देशभर ८७ जनाको आइसोलेसनमा उपचार भइरहेको छ ।