बीरगञ्जमा थप २ जनामा कोरोना संक्रमण पुष्टी, मुलुकमा कोरोना संक्रमितको संख्या ५१ पुगे

जनस्वास्थ्य सरोकार, बीरगञ्ज । वीरगन्जमा थप २ जनामा कोरोना भाइरस कोभिड–१९ संक्रमण पुष्टि भएको छ । यो सँगै मुलुकमा कोरोना संक्रमितको संख्या ५१ पुगेको छ ।

वीरगन्ज महानगरपालिका वडा नम्बर २ र ३ का दुई पुरुषमा पीसीआर परीक्षण गर्दा कोरोना पोजिटिभ देखिएको हो । छपकैयाको मस्जिदमा बसेका तीनजना भारतीय संक्रमितको सम्पर्कमा आएकाहरुको स्वाब लिइ पीसीआर परीक्षणका लागि काठमाडौं पठाइएकोमा दुईजनामा पोजिटिभ देखिएको हो ।

दुवैजनालाई नारायणी अस्पतालको आइसोलेसनमा ल्याइएको छ । यीमध्ये एकजना महानगरका सफाइ कर्मचारी हुन् । अर्का व्यक्तिलाई सिद्धार्थ माविको क्वारेन्टाइनबाट आइसोलेसनमा ल्याइएको पर्साका सहायक प्रमुख जिल्ला अधिकारी ललितकुमार बस्नेतले जानकारी दिनुभएको छ । अस्पतालबाट आजै चारजना संक्रमितलाई डिस्चार्ज गर्ने तयारी भइरहेको छ, जसमा तीनजना जमाती रहेका छन् ।