मुलुकमा १६ जनाले जिते कोरोना, पर्सामा एकैदिन ४ जना अस्पतालबाट डिस्चार्ज

जनस्वास्थ्य सरोकार, काठमाडौं । मुलुकमा कोरोना भाइरस (कोभिड—१९) जित्नेहरुको संख्या १६ पुगेको छ । आइतबार पर्सा जिल्लामा थप ४ जना निको भएर घर फर्किएसँगै देशमा कोरोना निको हुने व्यक्तिहरुको संख्या १६ पुगेको स्वास्थ्य तथा जनसंख्या मन्त्रालयले जनाएको छ ।

आइतबार नारायणी अस्पतालमा उपचाररत रौटहटका १९ वर्षीय युवक १२ औँ दिनमा र पर्साका ३ जना पुरुष १५ औँ दिनमा कोराना निको भएर घर फर्किएका छन् । मुलुकमा कोरोना संक्रमितमध्ये ३५ जनाको देशका विभिन्न अस्पतालहरुमा उपचार भइरहेको छ । संक्रमतिमध्ये धनगढीमा १ जना, वीरगन्जमा ३ जना, भरतपुरमा १ जना र विराटनगरमा ३० जनाको उपचार भइरहेको छ । हालसम्म मुलुकमा ५१ जना कोरोना संक्रमित भेटिएको छ ।

नेपालमा हालसम्म आरडीटी र पिसिआर प्रविधि दुवैगरी ५१ हजार ३ सय ६७ जनाको कोरोना परीक्षण भएको छ । जसमा आरडिटी विधिबाट ४१ हजार ४ सय ३६ र पीसीआर विधिबाट ९ हजार ९ सय ३१ नमुना परीक्षण भएका छन् ।

हाल मुलुकभर ११० जना व्यक्ति आइसोलेसनमा रहेका छन् जसमध्ये काठमाडौं उपत्यकामा ६ जना र काठमाडौं बाहिर १०४ को उपचार भइरहेको छन् । यसैगरी क्वारेन्टाइनमा १७ हजार २५ जना रहेको मन्त्रालयले जानकारी गराएको छ ।