झुक्यायो र्यापिड टेष्टले, रौतहटमा थप दुई जनामा कोभिड —१९ पुष्टी, संक्रमितको संख्या ५४ पुग्यो

जनस्वास्थ्य सरोकार, रौतहट । रौतहट जिल्लामा थप दुई जनामा कोभिड १९ कोरोना भाइरस संक्रमित पुष्टी भएको छ । यो सँगै मुलुकमा कोरोना संक्रमितहरुको संख्या ५४ पुगेको छ ।

जिल्ला स्वास्थ्य कार्यालय रौतहटका प्रमुख महेश शाहका अनुसार, रौतहटको वृन्दावन नगरपालिका—९ भुषाहटोलका २५ वर्षीय युवक र देवाही गोनाही १ करुनिया टोलका ३५ वर्षीय पुरुषमा कोरोना संक्रमण देखिएको हो ।

जनकपुरबाट आएको प्रादेशिक टोलीले र्यापिड डायग्नोष्टिक टेष्ट (आरडीटी) मा नतिजा नेगेटिभ देखिएपछि ल्याबमा परीक्षण गर्दा नेगेटिभ आएपछि बृन्दाबन ९ का बिरामी रौतहटको चन्द्रपुर नगरपालिका—६ स्थित क्वारेन्टाइनमा १४ दिन राखेर घर फर्काइएको थियो । कलकत्ताबाट आएका उनी बैशाख ६ गते घर गएका थिए । देवाही गोनाहीका संक्रमित ३५ वर्षका पुरुष भने क्वारेन्टाइनमै बस्दै आएका छन् । उनी दिल्लीबाट बैसाख ४ गते घर आएका थिए । दुवैको काठमाडौंको टेकुस्थित राष्ट्रिय जनस्वास्थ्य प्रयोगशालामा गरेको परीक्षणमा कोरोना संक्रमण पुष्टि भएको हो । काठमाडौंबाट गत वैशाख १२ गते आएको चार जनाको टोलीले रौतहटको ८ क्वारेन्टाइनबाट ७ महिलासहित ८३ जनाको स्वाब संकलन गरेर लगेको थियो । सोही स्वाबमध्ये दुई जनाको रिपोर्ट पोजेटिभ आएको हो ।