पर्सामा थप १७ जनामा कोरोना पुष्टि, नेपालमा दुई महिनाको शिसुसहित संक्रमितको संख्या ९९ पुग्यो

जनस्वास्थ्य सरोकार, काठमाडौं । नेपालमा थप १७ जनामा कोभिड १९ कोरोना भाइरस पुष्टि भएको छ । यो सँगै मुलुकमा कोरोना संक्रमितहरुको संख्या ९९ पुगेको छ । स्वास्थ्य तथा जनसंख्या मन्त्रालयको नियमित पत्रकार सम्मेलनमा प्रवक्ता डा. विकास देवकोटाले सो जानकारी गराउनुभएको हो ।

नेपालमा पहिलो पटक दुई महिनाको शिशुमासमेत कोभिड १९ कोरोना भाइरस संक्रमण देखिएको छ । स्वास्थ्य तथा जनसंख्या मन्त्रालयका अनुसार बुधबार पर्साका दुई महिनादेखि ६६ वर्षसम्मका गरेर १७ जनामा कोरोना पुष्टि भएको हो । जसमध्ये सात महिला र १० पुरुष छन् । संक्रमितमध्ये हालसम्म २२ जना भने निको भएका छन् ।

मन्त्रालयका अनुसार, हालसम्म पिसीआर विधिबाट १४ हजार ९६ नमुना परीक्षण भएका छन् भने आरडीटी विधिबाट ५२ हजार ९ सय ७० जनामा कोरोना परीक्षण भएको छ । पछिल्लो २४ घण्टामा ९ सय ९१ नमुना परीक्षण भएको प्रवक्ता डा. देवकोटाले जानकारी गराउनुभयो ।