बढ्दो कोभिड १९ संक्रमणः आगामी जेठ ५ गतेसम्म कपिलवस्तु सिल गरियो

जनस्वास्थ्य सरोकार, कपिलवस्तु । कोभिड १९ कोरोना भाइरस संक्रमितको संख्या बढ्न थालेपछि कपिलवस्तु जिल्लालाई सिल गरिएको छ। जिल्ला प्रशासन कार्यालयमा सोमबार दिउँसो बसेको सुरक्षा समितिको बैठकले आज साँझ ५ बजेदेखि जेठ ५ गते राती १२ बजेसम्म सिल गर्ने निर्णय गरिए हो ।

यस अवधिमा अति आवश्यक वस्तु ढुवानी गर्ने सवारी साधन, एम्बुलेन्स, शववाहन राजमार्ग भएर गुड्ने साधनहरुलाई रोक लगाइने छैन । तर जिल्ला भित्र गुड्ने सवै प्रकारका सवारी साधन, मानिसको आवतजावत र सम्पूर्ण किसिमका उद्योग धन्धा तथा कलकारखानाहरु सञ्चालनमा पूर्ण रोक लगाइएको छ।

स्थानीय प्रशासन ऐन २०२८ को दफा ६ (३) क र संक्रमक रोग ऐन २०२० को दफा २ (१०) बमोजिम जिल्लामा हुने सवै गतिविधि, ओहोरदोहोर र क्रियाकलापलाई पूर्ण रोक लगाइएको छ । जिल्लाबासीलाई खाद्यान्न र तरकारी किन्न विहान ७ बजे देखि ९ बजेसम्म खुला गरिएको छ । जिल्लामा हाल १५ जनामा कोरोनाको संक्रमण देखिएको छ। उनीहरु सवै भारतको महाराष्ट्रबाट नेपाल प्रवेश गरेका नागरिक हुन्।