काठमाडौं र भक्तपुरमा पनि देखियो कोरोना, मंगलबारमात्र ८३ जना संक्रमित पुष्टि, संक्रमितको संख्या २१७ पुग्यो

जनस्वास्थ्य सरोकार, काठमाडौं । नेपालमा मंगलबार मात्र ८३ जनामा कोभिड १९ कोरोना संक्रमित पुष्टि भएको छ ।

मंगलबार राति १० बजे स्वास्थ्य तथा जनसंख्या मन्त्रालयले जारी गरेको विज्ञप्तिमा थप २६ जनामा कोरोना भाइरस संक्रमण पुष्टि भएको हो । यसरी संक्रमित पुष्टि हुनेहरुमा पर्सा जिल्लाका २२, २८, २८, ३२, ४५, ६० वर्षीया महिला, १६, २२, २४, २५, २५, २८, २८, ३२, ५९, ५५, ६१, ६१ वर्षीय पुरुष, महोत्तरीका १६ र २५ वर्षीय पुरुष, धनुषाका २० वर्षीया महिला र ४० वर्षीय पुरुष, भक्तपुर जिल्ला निवासी २५ वर्षीया महिला र २७ वर्षी पुरुष, काठमाडौंका ३३ वर्षीया महिला, सर्लाहीका ४५ वर्षीय पुरुष रहेका छन् । सोही दिन अपरान्ह मन्त्रालयले ५७ जनामा कोभिड १९ कोरोनाभाइरस सङ्क्रमण पुष्टि गरेको थियो । यो सँगै मुलुकमा कोभिड १९ संक्रमितहरुको संख्या २१७ पुगेको छ । जसमम्ये १७५ जना पुरुष र ४२ जना महिला रहेका छन् ।

राष्ट्रिय जनस्वास्थ्य प्रयोगशालामा गरिएको परीक्षणमा उक्त संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । उनीहरुको स्वास्थ्य अवस्था सामान्य रहेको र स्वास्थ्यकर्मीको निगरानीमा रहेको मन्त्रालयले जनाएको छ । नेपालको प्राय सिमावर्ती क्षेत्रका जिल्लाहरुमा कोभिड १९ को संक्रमण बढ्दै गएको छ । भारतबाट लुकीछिपी नेपाल प्रवेश गरेका व्यक्तिहरुमा कोभिड १९ पहिचान भइरहेको छ । स्वीस र चीन सरकारले पिसिआर विधिबाट परीक्षण गरिने किट नेपाललाई सहयोग उपलब्ध गराएसँगै परीक्षण लेबल बढेको र कोरोना संक्रमित पहिचान भएको छ । हालसम्म नेपालमा १८ हजार ९६४ जनाको नमुना परीक्षण पिसिआर प्रविधिबाट भएको छ । संभावित संक्रमित व्यक्तिहरुको संख्या २२८ आइसोलेसनमा रहेको छ ।

हालसम्म ३३ जना निको भएर अस्पतालबाट डिस्चार्ज भइसकेका छन् ।

तर निको भएका भनिएका तीन जनाको शरीरमा कोरोनाभाइरस पुनः देखिएपछि फेरि अस्पतालमा भर्ना गरिएको छ ।