भक्तपुर कोरोना संक्रमणः महिला स्टाफ नर्स र पुरुष सशस्त्र प्रहरी जवान

जनस्वास्थ्य सरोकार, भक्तपुर । भक्तपुरमा कोभिड १९ संक्रमण कोभिड १९ संक्रमण देखिएका एक पुरुष र एक महिलामध्ये पुरुष सशस्त्र प्रहरी र महिला स्टाफ नर्स रहेको जानकारी आएको छ ।

भक्तपुरको मध्यपुर ठिमी नगरपालिका ९ मा साथीसँग बस्ने २५ वर्षकी महिला स्टाफ नर्स  भक्तपुरको एक निजी अस्पतालमा काम गर्थिन् । उनी सुनसरीको झुम्काबाट दुई दिनअघि मात्र भक्तपुर आएकी थिइन् । उनको सुनसरीको रामधुनी नगरपालिका स्थायी घर हो । भक्तपुरका प्रमुख जिल्ला अधिकारी हुमकला पाण्डेका अनुसार, स्टाफ नर्स आफैं कोभिड १९ परीक्षणका लागि टेकुस्थित राष्ट्रिय जनस्वास्थ्य प्रयोगशाला पुगेकी थिइन् । पिसिआर परीक्षणमा कोभिड १९ रिपोर्ट पोजेटि देखिएको थियो ।

यसैगरी  २७ वर्षका संक्रमित पुरुष शसस्त्र प्रहरी भत्तफुरको चाँगुनारायण नगरपालिका १ सरस्वतीखेलस्थित सशस्त्र प्रहरीको नीलबाराही गणमा कार्यरत रहेको जानकारी प्राप्त भएको छ । तर भक्तपुर जिल्ला प्रशासन कार्यालय र प्रहरी परिसरले उनको विवरण सार्वजनिक गरेको छैन । उनको स्थायी घर रामेछाप हो । उनी दुवाकोटमा आफूले बनाएको घरबाट नै कार्यालय जाने गर्दथे । उनको स्वाव परीक्षणका लागि सशस्त्र प्रहरीले राष्ट्रिय जनस्वास्थ्य प्रयोगशाला टेकु पठाएको थियो ।

 प्रमुख जिल्ला अधिकारी पाण्डेले संक्रमित देखिएको ठाउँमा सिल गरिएको र उनीहरुको सम्पर्कमा भएका व्यक्तिहरुको पहिचान भइरहेको छ । दुवैको अुनसन्धान भइरहेको छ । हाल उनीहरु शहीद शुक्रराज ट्रपिकल सरुवा रोग अस्पतालमा रहेका छन् ।

नेपालमा मंगलबार मात्र ८३ जनामा कोभिड १९ कोरोना संक्रमित पुष्टि भएको थियो । मंगलबार राति १० बजे स्वास्थ्य तथा जनसंख्या मन्त्रालयले जारी गरेको विज्ञप्तिमा थप २६ जनामा कोरोना भाइरस संक्रमण पुष्टि भएको हो । यसरी संक्रमित पुष्टि हुनेहरुमा पर्सा जिल्लाका २२, २८, २८, ३२, ४५, ६० वर्षीया महिला, १६, २२, २४, २५, २५, २८, २८, ३२, ५९, ५५, ६१, ६१ वर्षीय पुरुष, महोत्तरीका १६ र २५ वर्षीय पुरुष, धनुषाका २० वर्षीया महिला र ४० वर्षीय पुरुष, भक्तपुर जिल्ला निवासी २५ वर्षीया महिला र २७ वर्षी पुरुष, काठमाडौंका ३३ वर्षीया महिला, सर्लाहीका ४५ वर्षीय पुरुष रहेका छन् । सोही दिन अपरान्ह मन्त्रालयले ५७ जनामा कोभिड १९ कोरोनाभाइरस सङ्क्रमण पुष्टि गरेको थियो । यो सँगै मुलुकमा कोभिड १९ संक्रमितहरुको संख्या २१७ पुगेको छ । जसमम्ये १७५ जना पुरुष र ४२ जना महिला रहेका छन् ।

नेपालको प्राय सिमावर्ती क्षेत्रका जिल्लाहरुमा कोभिड १९ को संक्रमण बढ्दै गएको छ । भारतबाट लुकीछिपी नेपाल प्रवेश गरेका व्यक्तिहरुमा कोभिड १९ पहिचान भइरहेको छ । स्वीस र चीन सरकारले पिसिआर विधिबाट परीक्षण गरिने किट नेपाललाई सहयोग उपलब्ध गराएसँगै परीक्षण लेबल बढेको र कोरोना संक्रमित पहिचान भएको छ । हालसम्म नेपालमा १८ हजार ९६४ जनाको नमुना परीक्षण पिसिआर प्रविधिबाट भएको छ । संभावित संक्रमित व्यक्तिहरुको संख्या २२८ आइसोलेसनमा रहेको छ ।

हालसम्म ३३ जना निको भएर अस्पतालबाट डिस्चार्ज भइसकेका छन् । तर निको भएका भनिएका तीन जनाको शरीरमा कोरोनाभाइरस पुनः देखिएपछि फेरि अस्पतालमा भर्ना गरिएको छ ।