कोरोनाले ज्यान गुमाउनेको संख्या ९ पुग्यो

जनस्वास्थ्य सरोकार, काठमाडौं । नेपालमा कोभिड १९ संक्रमण भएका व्यक्तिहरुको मृत्यु हुनेको संख्या ९ पुगेको छ । बुधबार दोलखाका ७६ वर्षीय एक पुरुषको निधन भएको छ । उनी जेष्ठ १३ गते काठमाडौंको सिनामंगलस्थित काठमाडौं मेडिकल कलेजमा उपचारका लागि भर्ना भएका थिए । उनलाई हेमोराइजिक स्ट्रोकको शल्यक्रिया गरिएको थियो । गत जेठ १५ गते स्वाव परीक्षणमा कोभिड १९ पोजेटिभ देखिएपछि थप उपचारका लागि त्रि.बि. शिक्षण अस्पताल महाराजगञ्जको आईसियू कक्षमा राखिएको थियो । उनको आज निधन भएको स्वास्थ्य मन्त्रालयका प्रवक्ता डा. विकास देवकोटाले बताउनुभयो । नेपालमा बुधबार २०१ जनामा कोभिड १९ कोरोना भाइरस संक्रमण पुष्टि भएको छ । यो सँगै मुलुकमा कोभिड १९ संक्रमितहरुको संख्या २३ सय पुगेको स्वास्थ्य तथा जनसंख्या मन्त्रालयले जनाएको छ । जसमा पुरषहरु २१ सय ३० जना र महिला १७० जना रहेका छन् । हाल १ लाख ५५ हजार ८६८ जना क्वारेन्टाइनमा रहेका छन् । हालसम्म पीसीआर विधिबाट ८० हजार २ सय ६७ र आरडीटी विधिबाट १ लाख २० हजार ३ सय ७९ जनाको नमुना परीक्षण गरिएको छ । पछिल्लो २४ घण्टामा पीसीआर विधिबाट ४ हजार ९ सय २४ र आरडीटी विधिबाट ४ हजार ३४ जनाको नमुना परीक्षण गरिएको मन्त्रालयका प्रवक्ता डा. विकास देवकोटाले बताउनुभयो । तेह्रथुम, ताप्लेजुङ र पाँचथरमा नयाँ संक्रमण देखिएसँगै मुलुकमा संक्रमण देखिएका जिल्लाहरुको संख्या ६४ पुगेको छ । मुलुकमा कोरोना जित्नेहरुको संख्या २७८ पुगेको छ । यसमा २२२ पुरुष ५६ जना महिला रहेको स्वास्थ्य तथा जनसंख्या मन्त्रादयका प्रवक्ता डा. विकास देवकोटाले बताउनुभयो ।