कोरोना अघि अघि परीक्षण पछि पछि ! संक्रमित ३२३५, निको ३६५, संक्रमित जिल्ला ७०

जनस्वास्थ्य सरोकार, काठमाडौं । नेपालमा शनिबार थप ३२३ जनामा कोभिड १९ कोरोना भाइरस संक्रमण पुष्टि भएको छ । यो सँगै मुलुकमा कोभिड १९ संक्रमितहरुको संख्या ३ हजार २३५ पुगेको स्वास्थ्य तथा जनसंख्या मन्त्रालयले जानकारी गराएको छ । हरेक दिन संक्रमितको संख्या बढ्दै गएको छ । बिहीबार ३३४ र शुक्रबार २७८ जनामा कोरोना संक्रमण पुष्टि भएको थियो । अहिले आइसोलेसनमा दुई हजार ८ सय ५७ जनाको उपचार भइरहेको छ । क्वारेन्टाइनमा १ लाख ६८ हजार ३१ जना रहेका छन् । शनिबार मात्र ३२ जना डिस्चार्ज भएका छन् । यसरी डिस्चार्ज हुनेहरुमा जनकपुर प्रदेशिक अस्पतालबाट १५, सुशिल कोइराला क्यान्सर प्रखर अस्पताल बाँकेबाट ४, सेति अस्पतालबाट ६ जना, सुर्खेतबाट ७ जना डिस्चार्ज भएका छन् । यो सँगै मुलुकमा कोरोना जित्नेहरुको संख्या ३ सय ६५ पुगेको छ । उनीहरुमध्ये २९९ जना पुरुष र ६६ जना महिला रहेका छन् ।

शनिबार दुई जना मृतकको पीसीआर रिपोर्ट पोजिटिभ आएको छ । डोल्पाको जगदुल्ला गाँउपालिका–३ एक ५८ वर्षीय पुरुषको जेठ २१ गते दिउँसो २ बजे मृत्यु भएको हो । उनी दमको रोगी रहेको र उनको स्वाब कर्णाली स्वास्थ्य विज्ञान प्रतिष्ठानमा परीक्षण गर्दा रिपोर्ट पोजिटिभ आएको थियो । होम आइसोलेसनमै रहेका उनको जेठ २० गते मृत्यु भएको हो । मृत्युपछि उनको स्वाब संकलन गरी कर्णाली स्वास्थ्य विज्ञान प्रतिष्ठनमा पीसीआर परीक्षणका लागि पठाइएको थियो । शनिबार आएको उनको पीसीआर परीक्षणको रिपोर्ट पोजेटिभ आएको हो । सुरक्षाका उपाय अपनाई उनको दाहसंस्कार गरिएकाले गाँउपालिकाका सबै नाका सिल गरिएको छ । उनीसँगै १२ जना अन्य नागरिक पनि जगदुल्लामा आएका थिए । उनीहरु हाल क्वारेन्टाइनमा छन् ।

त्यसैगरी धनगढीको सेती अस्पतालको प्रयोगशालामा गरिएको परीक्षणमा अर्की एक मृतक ५५ वर्षीय महिलाको पीसीआर रिपोर्ट पोजिटिभ आएको छ । उनी मिर्गौला रोगसँग लडिरहेकी थिइन् । उनको डायलासिसकै क्रममा जेठ २३ गते दिउँसो १२ बजे मृत्यु भएको थियो । त्यसपछि स्वाब लिएर परीक्षण गर्दा रिपोर्ट पोजिटिभ आएको हो । उनमा कोरोनाको कुनै लक्षण नदेखिएको प्रवक्ता देवकोटाले जानकारी दिनुभयो । यो सँगै नेपालमा कोरोनाका कारण मृत्यु हुनेहरुको संख्या १३ पुगेको छ । अहिले प्रदेश नं २ र ५ सर्वाधिक सङ्क्रमित छन् । हालसम्म पीसीआर विधिबाट ९२ हजार ४ सय ७७ र आरडीटी विधिबाट एक लाख ३७ हजार ४ सय ३५ जनाको नमुना परीक्षण गरिएको छ । पछिल्लो २४ घण्टामा पीसीआर विधिबाट ४ हजार १ सय ११ र आरडीटी विधिबाट ५ हजार ५ सय ७० जनाको नमुना परीक्षण गरिएको छ । जाजरकोट र डोल्पामा पनि संक्रमित भेटिएपछि कोभिड—१९ बाट प्रभावित हुने जिल्लाको संख्या ७० पुगेको छ ।