हल्का वर्षा जारी, गर्मीबाट राहत

नेपाल हेल्थ न्युज, काठमाडौं — देशका विभिन्न भागमा आइतबारदेखि सुरु भएको हल्कादेखि मध्यम वर्षा सोमबार र मंगलबारसम्म जारी रहने जल तथा मौसम विज्ञान विभागले जनाएको छ।

पश्चिमी वायु, स्थानीय वायु र बंगालको खाडीबाट आएको जलवाष्पयुक्त हावाको असरले वर्षा भएको मौसमविद् गोविन्द झाले बताए।

लुम्बिनी र सुदूरपश्चिमका केही तराई क्षेत्रमा गर्मी कायमै रहेकाले सतर्कता अपनाउन आग्रह गरिएको छ। कोशी, मधेश र बागमती प्रदेशमा हल्का वर्षाको सम्भावना रहेको छ भने उच्च हिमाली क्षेत्रमा हल्का हिमपात पनि हुन सक्ने जनाइएको छ। बुधबारदेखि मौसममा सामान्य सुधार आउने अनुमान गरिएको छ।