खोप छुटेका पाँच वर्षमुनिका बालबालिकालाई आज पुनः खोप सेवा, अभिभावकलाई स्वास्थ्य संस्थामा जान आग्रह

नेपाल होल्थ न्युज, काठमाडौं । नियमित खोप अभियानअन्तर्गत आज देशभर पाँच वर्षमुनिका खोप छुटेका बालबालिकालाई खोप सेवा प्रदान गरिँदैछ।

स्वास्थ्य सेवा विभागले अभिभावकहरुलाई अपिल गर्दै खोप छुटेका बालबालिकालाई नजिकको स्वास्थ्य संस्थामा लिएर आवश्यक खोप लगाउन आग्रह गरेको छ। हाल बालबालिकालाई विद्यालयमा भर्ना गर्दा खोप कार्ड अनिवार्य गरिएको छ, जसले खोपको महत्व अझ बढाएको छ।

यसै क्रममा, चितवन जिल्लामा पनि जनस्वास्थ्य कार्यालयले सबै स्थानीय तहहरुमार्फत खोप कार्यक्रम सञ्चालन गरिएको जानकारी दिएको छ। कार्यालयका प्रतिनिधि राम केसीका अनुसार आज जिल्लाभरिका सातवटै पालिकामा रहेका सरकारी स्वास्थ्य संस्थाहरुमा खोप उपलब्ध गराइनेछ।

केसीले राष्ट्रिय खोप तालिकाअनुसार छुटेका खोप दिने व्यवस्था गरिएको जनाउँदै, सबै अभिभावकलाई सेवा लिन आह्वान गरेका छन्।