स्वास्थ्य बजेटमा चुनौती, मातृ–शिशु सेवा प्रभावित, सहयोग आवश्यक – मन्त्री पौडेल

नेपाल हेल्थ न्युज, काठमाडौँ । नेपालका स्वास्थ्य तथा जनसंख्या मन्त्री प्रदीप पौडेलले हालै वैदेशिक विकास सहायता घट्दो क्रममा रहेकाले देशका मातृ, बाल तथा नवजात शिशु स्वास्थ्य कार्यक्रमहरूमा प्रतिकूल असर परेको बताउनुभएको छ। उहाँले यस्तो अवस्थाका बीच अन्तरराष्ट्रिय सहयोग निरन्तर रहनु आवश्यक भएको उल्लेख गर्दै संयुक्त राष्ट्रसङ्घ र अन्य दातृ संस्थाहरूलाई स्थायी सहयोगका लागि आह्वान गर्नुभएको छ।

यो भनाइ मन्त्री पौडेलले स्वीट्जरल्याण्डको जेनेभामा विश्व स्वास्थ्य सङ्गठन (WHO) को ७८औं सभाअघि आयोजना गरिएको मन्त्रीस्तरीय छलफलमा राख्नुभएको हो। उहाँले सहायताको कटौतीका कारण प्राथमिक स्वास्थ्य सेवामा चुनौती उत्पन्न भइरहेको र यसले खासगरी महिलाहरू र साना बालबालिकाहरूको पहुँचमा असर पारेको बताउनुभयो।

उहाँका अनुसार अहिले नेपालका करिब ५० लाख प्रजनन उमेरकी महिलाले पाउँदै आएको स्वास्थ्य सेवामा र पाँच वर्ष मुनिका १५ लाख बालबालिकालाई लक्षित पोषण कार्यक्रमहरूमा बजेट अभाव देखिएको छ। त्यस्तै, ३५ लाख वयस्क नागरिकले पाउँदै आएको प्रजननसम्बन्धी शिक्षामा पनि कटौतीको असर परेको छ।

मन्त्री पौडेलले नेपालले आन्तरिक स्रोतबाट स्वास्थ्य क्षेत्रमा लगानी बढाउने कोसिस जारी राखेको भए पनि बजेट अभावले ठूलो चुनौती खडा गरेको बताउनुभयो। विशेष गरी नेपालजस्ता विकासोन्मुख तथा अल्पविकसित मुलुकहरूमा यस्तो सहयोग अत्यन्त जरुरी रहेको भन्दै उहाँले आर्थिक तथा प्राविधिक सहयोग दीगो रूपमा जारी राख्न अपिल गर्नुभयो।

सभामा मन्त्री पौडेलले नेपालले मातृ शिशु स्वास्थ्य सुधारका क्षेत्रमा हासिल गरेका सफलताहरू पनि प्रस्तुत गर्नुभयो। उहाँका अनुसार, सन् २०२३ मा नेपालले मातृ मृत्युदरमा उल्लेखनीय सुधार ल्याएको छ—सन् २००० सँग तुलना गर्दा यो दर ७१ प्रतिशतले घटेको छ। उहाँले यो प्रगति कायम रहँदा सन् २०३० सम्म दिगो विकास लक्ष्य (SDG) हासिल गर्न सकिने विश्वास व्यक्त गर्नुभयो।