मर्यादापालकहरूलाई पोषणयुक्त खाजा र भत्ताको माग, सांसद विना लामाको संसदमा आवाज

नेपाल हेल्थ न्युज, काठमाडौं । राष्ट्रिय प्रजातन्त्र पार्टीकी सांसद विना लामाले संसद् भवनमा कार्यरत मर्यादापालकहरूका लागि पोषणयुक्त खाना र खाजाको व्यवस्था गर्न सरकारको ध्यानाकर्षण गराउनुभएको छ।

मंगलबारको प्रतिनिधि सभा बैठकमा बोल्दै सांसद लामाले बिहान सबेरैदेखि बेलुकासम्म सांसदहरूको सुरक्षाका लागि खटिने मर्यादापालकहरूको स्वास्थ्य र भरणपोषणप्रति सरकार उदासीन देखिएको टिप्पणी गर्नुभयो। उहाँले मर्यादापालकहरूलाई कुनै खाजा, खाना वा भत्ताको व्यवस्था नभएको गुनासो गर्दै तिनको मौन सेवाको उचित कदर हुनुपर्नेमा जोड दिनुभयो।

उहाँहरू बिहान ७ बजेदेखि बेलुकासम्म उभिएर हामी सांसदहरूको सुरक्षामा खटिनुहुन्छ, सांसद लामाले भन्नुभयो, तर न त आवाज उठाउन सक्नुहुन्छ, न आन्दोलन गर्न सक्नुहुन्छ। यस्तो मौन सेवा दिइरहँदा सरकारले खाजासमेतको व्यवस्था नगर्नु दुःखद छ।

सांसद लामाले सरकारलाई मर्यादापालकहरूको स्वास्थ्य र मनोबल उच्च राख्न पोषणयुक्त खाना र खाजाको तत्काल व्यवस्था गर्न आग्रह गर्नुभयो। उहाँको भनाइले संसदभित्रै सेवा पुर्‍याउने सुरक्षाकर्मी तथा मर्यादापालकहरूको सामाजिक सुरक्षामाथि गम्भीर बहस सिर्जना गरेको छ।