कालीमाटी बजारमा बिक्रीको लागि ल्याइएको धनियाँमा उच्च विषादी भेटियो

नेपाल हेल्थ न्युज,काठमाडौं । मुलुकको प्रमुख तरकारी बिक्री केन्द्र कालीमाटी बजारमा भित्रिएको धनियाँमा अत्यधिक मात्रामा विषादीको अवशेष फेला परेको छ।

काभ्रेपलाञ्चोकबाट ल्याइएको हरियो धनियाँमा अर्गानोफस्फेट नामक रसायनको मात्रा ९९.३७९ प्रतिशत पाइएपछि उक्त धनियाँ स्वास्थ्यका लागि हानिकारक मानिएको छ। कालीमाटी फलफूल तथा तरकारी बजार विकास समितिका अनुसार यो परिणाम केन्द्रीय कृषि प्रयोगशालाको परीक्षणबाट आएको हो।

मंगलबार गरिएको परीक्षणमा कालीमाटी बजारका १७ वटा पसलबाट संकलित फलफूल तथा तरकारीका नमूनामध्ये धनियाँमा सबैभन्दा बढी विषादी देखिएको हो। यसरी अत्यधिक विषादी मिसिएको धनियाँ उपभोग गर्न नहुने भन्दै सम्बन्धित निकायले उपभोक्तालाई सचेत रहन आग्रह गरेका छन्।