लैङ्गिक हिंसाविरुद्धको अभियानमा युएनएफपीए र मनकामना दर्शनबीच सहकार्य

नेपाल हेल्थ न्युज, काठमाडौं । लैङ्गिक हिंसा न्यूनीकरण तथा जनचेतना अभिवृद्धिमा सहकार्य गर्ने उद्देश्यले युएनएफपीए (संयुक्त राष्ट्रसंघको यौन तथा प्रजनन स्वास्थ्यसम्बन्धी संस्था-र मनकामना दर्शन प्रा.लि.बीच औपचारिक साझेदारी भएको छ।

काठमाडौँमा मङ्गलवार आयोजित कार्यक्रममा युएनएफपीएका प्रतिनिधि योन योङ हङ र मनकामना दर्शन प्रा.लिका तर्फबाट यसु श्रेष्ठले सम्झौतामा हस्ताक्षर गरेका हुन्।

साझेदारी अन्तर्गत दुवै संस्थाले आगामी दुई वर्षसम्म महिला र किशोरीहरूलाई लैङ्गिक हिंसासम्बन्धी सूचना, सहयोग र पुनःस्थापनाका अवसरहरू प्रदान गर्ने गरी संयुक्त प्रयास गर्ने भएका छन्।

मनकामना दर्शन प्रा.लिले आफ्ना सेवा केन्द्रहरू—जस्तै टिकट बिक्री काउन्टरहरू—मा पोस्टर, पम्पलेट र श्रव्य(दृश्य सामग्रीमार्फत लैङ्गिक हिंसा सम्बन्धी जानकारी प्रवाह गर्नेछ। यसबाट सेवा उपयोगकर्ताहरूले हिंसा भोगेमा उपलब्ध स्रोत, सेवा र अधिकारबारे सजिलो पहुँच पाउने अपेक्षा गरिएको छ।

साझेदारीको अर्को महत्वपूर्ण पक्ष भनेको हिंसा प्रभावितहरूलाई आर्थिक रूपमा सक्षम बनाउने तथा जीविकोपार्जनका अवसरहरूमा जोड्ने रहेको छ। त्यसका लागि स्थानीय श्रम बजार र व्यवसायिक संस्थाहरूको समन्वयमा कार्यक्रमहरू सञ्चालन गरिनेछ।

सम्झौतापछि युएनएफपीएकी प्रतिनिधि हङले निजी क्षेत्र सामाजिक रुपान्तरणका अभियानमा महत्वपूर्ण सहयात्री हुनसक्ने बताइन्। उनले समानता र सुरक्षाको संवाहक बन्न निजी क्षेत्रको संलग्नता आवश्यक रहेको उल्लेख गरिन्।

त्यस्तै, मनकामना दर्शनका यसु श्रेष्ठले महिला र किशोरीप्रति सुरक्षित वातावरण निर्माणमा सहयोग पुर्‍याउने उद्देश्यले युएनएफपीएसँग सहकार्य गर्नु संस्थाको सामाजिक उत्तरदायित्व भएको बताए।

दुवै पक्षले यो सहकार्य राष्ट्रका लैङ्गिक हिंसा अन्त्यसम्बन्धी लक्ष्य र संयुक्त राष्ट्रसंघको दीगो विकास लक्ष्यहरू  हासिल गर्न निजी क्षेत्रको भूमिकालाई सबल बनाउने उदाहरण हुने विश्वास व्यक्त गरेका छन्।