अन्तर्राष्ट्रिय प्रसूति फिस्टुला अन्त्य दिवस: नेपालमा अझै हजारौं महिला प्रभावित

नेपाल हेल्थ न्युज, काठमाडौं । आज अन्तर्राष्ट्रिय प्रसूति फिस्टुला अन्त्य दिवस मनाइँदैछ, तर नेपालमा अझै पनि हजारौं महिला यो पीडादायक रोगबाट प्रभावित छन्। अब्स्टेट्रिक फिस्टुला — जुन बच्चा जन्माउने क्रममा उत्पन्न हुने एक गम्भीर स्वास्थ्य समस्या हो  महिलामा दीर्घ प्रसव पीडा हुँदा, समयमै दक्ष प्रसूतिकर्मी वा आवश्यक उपचार नपाउँदा देखा पर्छ।

यस रोगका कारण महिलालाई पिसाब, दिसा वा दुबै अनियन्त्रितरूपमा चुहिने समस्या हुन्छ, जसले उनीहरूको शारीरिक मात्र होइन, मानसिक र सामाजिक जीवनलाई पनि गम्भीर असर पुर्‍याउँछ।

संयुक्त राष्ट्रसंघीय जनसंख्या कोष (यूएनएफपीए) को सन् २०११ को प्रतिवेदन अनुसार नेपालमा करिब ४,३०० महिला अब्स्टेट्रिक फिस्टुलाबाट पीडित छन्। यो तथ्यांकले देखाउँछ कि यो समस्या अझै पनि हाम्रो स्वास्थ्य प्रणालीको लागि एक चुनौतीका रूपमा उभिएको छ।

जहाँ विकसित राष्ट्रहरूमा यो रोग लगभग नष्ट भइसकेको छ, नेपाल जस्ता विकासोन्मुख देशहरूमा भने अझै पनि उचित जानकारीको कमी, स्वास्थ्य सेवाको पहुँचको अभाव र सामाजिक कलङ्कका कारण महिलाहरू यो रोगसँग लड्न बाध्य छन्।

यस दिवसले हामीलाई अब्स्टेट्रिक फिस्टुलाबारे जनचेतना फैलाउने, रोकथाम र उपचारका लागि प्रभावकारी नीति निर्माण गर्ने, र सबै महिलाले सुरक्षित मातृत्व सेवा पाउने वातावरण निर्माण गर्न आह्वान गर्दछ।