भरतपुरमा धुम्रपानबिरुद्ध चेतनामूलक र्यालीः धूम्रपानमुक्त राष्ट्रको माग

नेपाल हेल्थ न्युज, चितवन । विश्व धूम्रपान निषेध दिवस २०२५ को अवसरमा भरतपुरमा चेतनामूलक र्याली सम्पन्न भएको छ ।

नेपाल हेल्थ कप्र्सको आयोजनामा गरिएको र्यालीमा चितवन मेडिकल कलेज र कलेज अफ मेडिकल साइन्सेसका एमबिबिएस विद्यार्थीहरू तथा भरतपुर अस्पतालका नर्सिङ विद्यार्थीहरूको सहभागिता रहेको थियो ।

र्याली भरतपुरको प्रमुख सडक क्षेत्र हुँदै सम्पन्न भएको थियो । सहभागीहरूले ‘धूम्रपानलाई होइन, जीवनलाई रोजौं’, ‘स्वस्थ समाज, धूम्रपानमुक्त राष्ट्र’, ‘धूम्रपानले मार्छ, रोकौं आजै’ जस्ता नारासहित जनचेतना फैलाएका थिए ।

युवा पुस्ता तथा सर्वसाधारणमा धूम्रपानजन्य पदार्थको सेवनले निम्त्याउने स्वास्थ्य जोखिमबारे जागरूकता फैलाउने र धूम्रपानमुक्त राष्ट्र निर्माणको अभियानलाई सशक्त बनाउने कार्यक्रमको उद्देश्य  रहेको आयोजकले बताएका छन् ।

विश्व स्वास्थ्य संगठन ( डब्लुएचओ) ले हरेक वर्ष मे ३१ तारिखमा विश्व धूम्रपान निषेध दिवस मनाउँदै आएको छ । यस वर्षको नारा ‘सर्तीजन्य उद्योगको आकर्षक चाल, प्राणघातक असर चिनौ यो महजाल (अनमास्किङ द अपिलः एक्सपोजिङ इन्डस्ट्री ट्याक्टिस अन टोवाको एण्ड निकोटिन प्रोडक्टस्’ रहेको छ ।

नेपालमा पनि युवाहरूमा धूम्रपानको लत बढ्दै गएको सन्दर्भमा यस्ता चेतनामूलक कार्यक्रमहरू प्रभावकारी हुने स्वास्थ्यकर्मीहरूको विश्वास छ । आयोजक  संस्था नेपाल हेल्थ कप्र्सले आगामी दिनमा पनि जनस्वास्थ्यका सवालमा यस्ता क्रियाकलापलाई निरन्तरता दिने प्रतिबद्धता जनाएको छ ।