पुल बगाएपछि जोखिम मोलेर यसरी पुर्‍याइयो औषधी र खोप

नेपाल हेल्थ न्युज, हुम्ला । नाम्खा गाउँपालिका–६ को हिमालपारिको लिमी क्षेत्रस्थित तील गाउँमा जेठ १ गते राति गएको  पहिरोपछि औषधी र खोपको अभाव भएको थियो। काठे पुल बगाएपछि आवतजावत पूर्ण रूपमा अवरुद्ध भएको र यस्तो अवस्थामा स्वास्थ्य सेवा पु¥याउन निकै चुनौतीपूर्ण बनेको थियो।

स्वास्थ्यकर्मीहरूको टोलीले स्थानीय बासिन्दाको सहयोगमा तील खोलामा जोखिम मोलेर औषधी र खोप पुर्‍याएको छ। खोला पार गर्न कुनै पुल नभएपछि टोलीका सदस्यहरू खोलाको दुई किनारामा बसेर औषधी र खोपका सामग्रीलाई तार वा अन्य साधनको प्रयोग गरेर सुरक्षित रूपमा पार गराएका थिए।

स्वास्थ्य शाखा प्रमुख ग्याछो लामाका अनुसार, जसोतसो खोलाबाट सामाग्री सारेर गाउँभित्र पु¥याएपछि दुई बालबालिकालाई नियमित खोप लगाइएको र अन्य सबै बासिन्दाको स्वास्थ्य परीक्षण गरिएको हो।

त्यसपछि टोलीले गाउँमा महामारी नियन्त्रण, सरसफाइ, स्वच्छ खानेपानी, पोषण तथा मानसिक स्वास्थ्यबारे परामर्शसमेत दिएको थियो। साथै, स्थानीयहरूको पोषण अवस्थाको लेखाजोखा गरिएको र आवश्यक सुझावहरू प्रदान गरिएको थियो।

यस्तो विषम परिस्थितिमा पनि स्वास्थ्यकर्मीहरूले देखाएको समर्पण र सहयोगप्रति गाउँलेहरू आभार व्यक्त गरिरहेका छन्।गोरखापत्र