वीरमा ब्रेन ट्युमर शल्यक्रिया निःशुल्क

नेपाल हेल्थ न्युज, काठमाडौं । अस्पतालले आगामी एक महिना भर ब्रेन ट्युमरको निःशुल्क शल्यक्रिया सेवा उपलब्ध गराउने भएको छ। अस्पतालका मस्तिष्क विभाग प्रमुख डा. राजीव झालेले बताए अनुसार, जुन महिनाभर अस्पतालको नयाँ स्थापित राष्ट्रिय ब्रेन ट्युमर केन्द्रले ब्रेन ट्युमर भएका बिरामीहरूलाई निशुल्क शल्यक्रिया गर्नेछ।

डा. झालेले ब्रेन ट्युमर दिवसको अवसर पारेर यो विशेष कार्यक्रम सञ्चालन गर्ने निर्णय भएको जानकारी दिनुभएको हो। यस अभियानअन्तर्गत, बिरामीहरूले वीर अस्पतालमा आएर निशुल्क शल्यक्रिया गराउन सक्नेछन्।

राष्ट्रिय ब्रेन ट्युमर केन्द्रका संस्थापक अध्यक्ष समेत रहनुभएका प्रा. डा. झालेले, एक हप्तामा पाँच दिन शल्यक्रिया सञ्चालन हुने र दैनिक तीनदेखि पाँच जनाको उपचार हुने बताउनुभयो। सामान्यतया वीर अस्पतालमा ब्रेन ट्युमरको शल्यक्रियाको शुल्क ३५ हजार रुपैयाँ लाग्ने भए पनि यस कार्यक्रमअन्तर्गत बिरामीलाई शल्यक्रिया, शय्या र खानासमेत निःशुल्क उपलब्ध गराइनेछ।

तर, शल्यक्रियामा आवश्यक औषधि तथा उपकरणहरूको व्यवस्था बिरामी आफैले गर्नुपर्ने हुनाले अस्पतालले त्यसबारे जानकारी दिएको छ।