सङ्घीय अस्पतालमा दुई हजारभन्दा बढी जनशक्ति थपिने तयारी

नेपाल हेल्थ न्युज, काठमाडौं । स्वास्थ्य तथा जनसंख्या मन्त्रालयले देशभरका संघीय अस्पतालहरूमा थप स्वास्थ्य जनशक्ति समावेश गर्ने तयारी तीव्र बनाएको छ। मन्त्रालयले हालै प्रस्तुत गरेको प्रतिवेदन अनुसार आगामी वर्षहरूमा दुई हजारभन्दा बढी प्राविधिक जनशक्ति अस्पतालहरूमा नियुक्त हुने छन्।

स्वास्थ्य मन्त्री प्रदीप पौडेलको नेतृत्वमा अर्थ मन्त्रालयसँगको सहकार्यपछि यस योजना कार्यान्वयनको चरणमा पुगेको हो। मन्त्रालयका सहसचिव ऋषि आचार्यको संयोजकत्वमा गठित कार्यदलले गरेको ‘संगठन तथा व्यवस्थापन सर्भेक्षण’ अनुसार कुल २,१०२ जना नयाँ कर्मचारी आवश्यक ठहर गरिएको छ।

यस योजनाअन्तर्गत, वीर अस्पतालमा सबैभन्दा धेरै ७७७ जना थपिने छन् भने त्यसअन्तर्गतको ट्रमा सेन्टरका लागि ९० जना छुट्याइनेछन्। अन्य प्रमुख संघीय अस्पतालहरूमध्ये कान्ति बाल अस्पतालमा ७८, परोपकार प्रसूति तथा स्त्रीरोग अस्पतालमा १७३, शुक्रराज ट्रपिकल तथा सरुवा रोग अस्पतालमा ३१७ जना जनशक्ति थप्ने योजना छ।

यस्तै, प्रदेशगत रूपमा कोशी अस्पतालमा १७२, नारायणीमा ३१८, भेरीमा १७९, गजेन्द्रनारायण स्मृति अस्पतालमा १४४ र भरतपुर अस्पतालमा ४६५ जना जनशक्ति थपिने छन्। डडेल्धुरा अस्पतालले ५२ जना र औषधि व्यवस्था विभाग तथा प्रयोगशालाहरूमा गरी थप ४० जनशक्ति पाउनेछन्।

सोमबार आयोजित प्रतिवेदन ग्रहण कार्यक्रममा मन्त्री पौडेलले जनशक्ति अभावका कारण सरकारी अस्पतालहरूमा सेवा प्रवाहमा कठिनाइ हुँदै आएको उल्लेख गर्दै यो योजनाले सेवा गुणस्तरमा सुधार ल्याउने विश्वास व्यक्त गर्नुभयो।

साथै, अस्थायी र करार सेवामा कार्यरत जनशक्तिलाई स्थायी दरबन्दीमा रूपान्तरण गर्न यो पहल सहयोगी हुने अनुमान गरिएको छ। सन् २००९ यता यति ठूलो परिमाणमा मानव संसाधन व्यवस्थापनसम्बन्धी विस्तृत सर्भेक्षण पहिलो पटक गरिएको हो।

यस योजनाले बढ्दो जनसंख्याका लागि गुणस्तरीय स्वास्थ्य सेवा प्रवाह गर्नका साथै रोजगार सिर्जनामा पनि महत्त्वपूर्ण योगदान पुर्‍याउने अपेक्षा गरिएको छ।