विदेशिन चाहने नेपाली श्रमिकका लागि स्वास्थ्य परीक्षणमा कडाइ, यस्ता छन् नयाँ मापदण्ड

नेपाल हेल्थ न्युज, काठमाडौं । वैदेशिक रोजगारीमा जाने नेपाली श्रमिकका लागि अब स्वास्थ्य परीक्षण कडा र व्यवस्थित ढंगले गरिने भएको छ। श्रम, रोजगार तथा सामाजिक सुरक्षा मन्त्रालयले स्वास्थ्य परीक्षण प्रक्रियालाई पारदर्शी र विश्वासिलो बनाउन नयाँ कार्यविधि लागू गरेको हो।

नयाँ कार्यविधिअनुसार अब श्रमिकको विस्तृत स्वास्थ्य परीक्षण अनिवार्य हुनेछ। यो प्रक्रियामा रक्त परीक्षण, क्षयरोग जाँच, मृगौला परीक्षण, हेपाटाइटिस बी र सी, मलेरिया, सुगर, टाइफाइड लगायत परीक्षण समावेश छन्। विशेषगरी मलेसिया जाने श्रमिकका लागि लागूपदार्थ (गाँजा, अफिम, कोकेन आदि) परीक्षण अनिवार्य गरिएको छ।

प्रत्येक स्वास्थ्य संस्थालाई परीक्षणका लागि निश्चित मापदण्डअनुसार काम गर्नुपर्नेछ, जसमा योग्य जनशक्ति, आवश्यक उपकरण, सूचना प्रणाली, र गुणस्तर सुनिश्चितता अनिवार्य छ। सरकारले शुल्क समेत तोकेको छ, जुनभन्दा बढी लिइन नपाइने व्यवस्था गरिएको छ।

स्वास्थ्य परीक्षण संस्थाहरूको इजाजत अब मन्त्रालयले मात्र दिनेछ र त्यसका लागि २१५ वटा सूचीबद्ध संस्थाको प्रयोगशाला परीक्षणपछि मात्र अनुमति दिइने छ।

मन्त्री शरतसिंह भण्डारीका अनुसार, श्रमिकहरूलाई अनावश्यक मृत्यु (जसलाई ‘डेथट्याब’ भनिन्छ) बाट जोगाउन स्वास्थ्य प्रणालीमा सुधार गरिएको हो। पछिल्लो १४ वर्षमा करिब १५ हजार नेपाली श्रमिकको विदेशमा मृत्यु भइसकेको छ, जसमा धेरैजसो हृदयघात, कार्यस्थल दुर्घटना र अन्य अस्पष्ट कारणहरूबाट भएका छन्।

३० सदस्यीय विशेषज्ञ समूहले श्रमिकका स्वास्थ्य समस्या आठवटा समूहमा वर्गीकृत गरी समाधानका सिफारिसहरू गरेको छ — जसमध्ये मानसिक, संक्रामक, शारीरिक, यौन स्वास्थ्यदेखि लिएर नसर्ने रोगहरू सम्म समावेश छन्। यसै आधारमा स्वास्थ्य परीक्षणको दायरा फराकिलो बनाइएको हो।