राप्ती अस्पतालमा डायलासिस मेसिन मर्मत नभएको कारण बिरामी संकटमा

नेपाल हेल्थ न्युज, दाङ । दाङको तुलसीपुरमा रहेको राप्ती प्रादेशिक अस्पतालमा डायलासिस मेसिन मर्मतका लागि लामो समयदेखि समस्या चलिरहेको छ। अस्पतालमा जम्मा १४ वटा डायलासिस मेसिनमध्ये पाँच वटा बिग्रिएका छन् र ती मेसिनहरू करिब एक वर्षदेखि मर्मत हुन सकेका छैनन्।

अस्पतालको डायलासिस विभाग प्रमुख लिना बडेलका अनुसार, मेसिन मर्मतका लागि काठमाडौंबाट इञ्जिनियर आउनुपर्ने भए पनि उनीहरूले पुरानो मोडल भएकाले मर्मत गर्न नआउने गरेका छन्। इञ्जिनियरहरूलाई बोलाइएको थियो, तर डिजाइन पुरानो भएको कारण आउन नमानेका हुन्, उहाँले बताउनुभयो।

मेसिन बिग्रिएपछि बिरामीहरूलाई डायलासिस सेवा पाउन गाह्रो भएको छ। घर नजिकै नै डायलासिस गर्न चाहने धेरैलाई अस्पतालले सेवा दिन नसकेको र कतिपयलाई घोराही, लमही, बुटवलसम्म जानुपर्ने अवस्था आएको छ। अहिले अस्पतालमा दैनिक करिब ७२ जना बिरामी डायलासिस सेवा लिइरहेका छन्।

यो अस्पतालमा दाङसहित सल्यान, रुकुम पूर्व, रुकुम पश्चिम, रोल्पा, प्यूठान लगायतका जिल्लाबाट बिरामीहरू उपचारका लागि आउने गरेका छन्।