२० औं ज्येष्ठ नागरिक दुर्व्यवहार विरुद्धको दिवस देशभर मनाइयो

नेपाल हेल्थ न्युज, काठमाडौं । आज देशभर २० औं ज्येष्ठ नागरिक दुर्व्यवहार विरुद्धको दिवस विभिन्न कार्यक्रममार्फत मनाइएको छ। महिला, बालबालिका तथा ज्येष्ठ नागरिक मन्त्रालयको समन्वयमा आयोजित यस वर्षको कार्यक्रममा ज्येष्ठ नागरिकप्रतिको सम्मान, सुरक्षा र संरक्षणलाई विशेष प्राथमिकता दिइएको छ।

अन्तर्राष्ट्रिय सन्देशअनुसार, दीर्घकालीन सेवामा रहेका ज्येष्ठ नागरिकमाथि भइरहेको दुर्व्यवहारलाई तथ्यमा आधारित तथ्यांक र प्रभावकारी काममार्फत अन्त्य गर्न जोड दिइएको छ। नेपाल सरकारले तय गरेको राष्ट्रिय सन्देश छ –“ज्येष्ठ नागरिक विरुद्ध हुने दुर्व्यवहार अन्त्यका लागि तथ्यमा आधारित नीति र प्रभावकारी कार्य”।

यस सन्देशले समाजभित्र लुकेको समस्या उजागर गरी दीर्घकालीन समाधानतर्फ सरकार, सामाजिक संस्था र समुदायलाई अग्रसर गराउने लक्ष्य राखेको छ।

कार्यक्रममा सहभागी विज्ञ, सामाजिक अभियन्ता, गैरसरकारी संस्था प्रतिनिधि तथा ज्येष्ठ नागरिकहरूले वृद्धवृद्धामाथि ग्रामीण र शहरी क्षेत्रमा भइरहेका दुर्व्यवहार, उपेक्षा, अपमान, सम्पत्ति दुरुपयोग, पारिवारिक असहयोग र मानसिक यातनाका घटनाहरूलाई गम्भीरताका साथ समिक्षा गर्दै सरकारलाई तत्काल सुधारका लागि आह्वान गरेका छन्।

मन्त्रालयका अनुसार, देशभरका सातै प्रदेशमा जनचेतनामूलक कार्यक्रम, छलफल तथा सम्मान कार्यक्रमहरू आयोजना गरिएका छन्।