स्वास्थ्य मन्त्री प्रदीप पौडेल अस्वस्थ, वीर अस्पतालमा भर्ना

नेपाल हेल्थ न्युज, काठमाडौं । स्वास्थ्य तथा जनसंख्या मन्त्री प्रदीप पौडेल अस्वस्थ भएपछि वीर अस्पतालमा भर्ना गरिएको छ।अस्पताल स्रोतका अनुसार, मन्त्री पौडेललाई शनिबार ज्वरो आउने लक्षण देखिएपछि उहाँलाई तुरुन्तै अस्पताल लगिएको हो।

उहाँको वीर अस्पतालको पुरानो भवनमा  भीभीआईपी वार्डमा उपचार भइरहेको छ। स्वास्थ्य परीक्षणहरू जारी रहेको अस्पताल स्रोतले जनाएको छ। प्रारम्भिक जानकारी अनुसार, उहाँको अवस्था गम्भीर नभए पनि सतर्कताका साथ स्वास्थ्य निगरानी गरिँदै छ।

मन्त्री पौडेलको स्वास्थ्यमा सुधार आइरहेको चिकित्सकहरूको प्रारम्भिक मूल्यांकन रहेको बताइएको छ। यद्यपि, विस्तृत परीक्षण रिपोर्ट आउन बाँकी रहेको र त्यसपछि मात्रै यकिन ढंगले केही भन्न सकिने चिकित्सकहरूले बताउनुभएको छ।

यसबीच, मन्त्रालयका स्रोतहरूले मन्त्री पौडेलको स्वास्थ्य अवस्थालाई लिएर चिन्ता नगर्न आग्रह गरेका छन् । “उहाँको अवस्था स्थिर छ, पूर्ण विश्राममा रहनु पर्ने सिफारिस गरिएको छ,” एक अधिकारीले जानकारी दिनुभयो।

मन्त्री पौडेल केही दिनदेखि व्यस्त तालिकामा रहनुभएको थियो र निरन्तर कामको दवावका कारण स्वास्थ्यमा असर परेको अनुमान गरिएको छ।