एक हप्तामा १४७ नयाँ डेंगी संक्रमित, देशभर ७३ जिल्लामा फैलियो संक्रमण

नेपाल हेल्थ न्युज, काठमाडौं । देशभर डेंगी संक्रमण फेरि तीव्र गतिमा फैलिन थालेको छ। इपिडिमियोलोजी तथा रोग नियन्त्रण महाशाखाको पछिल्लो विवरण अनुसार, गएको एक सातामै १४७ नयाँ डेंगी संक्रमित पुष्टि भएका छन्। यससँगै डेंगीका केसहरू नेपालका ७३ जिल्लामा फैलिएका छन्।

सन् २०२५ को सुरुवातदेखि जुलाई २३ तारिखसम्म डेंगी संक्रमितको कुल संख्या २,२३८ पुगेको छ। स्वास्थ्य अधिकारीहरूले सचेत रहन आग्रह गरेका छन्, विशेष गरी बरसातको मौसममा डेंगी फैलन सक्ने सम्भावना उच्च हुने भएकाले।

त्यस्तै, कोभिड–१९ संक्रमण पनि क्रमशः पुनः देखिन थालेको छ। यही अवधिमा, देशभर ३९१ जनामा कोभिड–१९ पुष्टि भएको छ भने यस रोगका कारण ३ जनाले ज्यान गुमाएका छन्। पछिल्लो २४ घण्टामा ६ जना र सात दिनभित्र २८ जना नयाँ संक्रमित थपिएका छन्।

देशका ४७ जिल्लामा कोभिड–१९ फैलिएको पुष्टि भएको छ। बागमती प्रदेशमा सबैभन्दा धेरै संक्रमित भेटिएका छन् — यहाँ मात्रै २७२ जनामा संक्रमण देखिएको छ, जसमा पछिल्लो सात दिनमा १० जना थपिएका छन्। कोशी प्रदेशमा ३९ जना, सुदूरपश्चिममा २२, लुम्बिनीमा २१, गण्डकीमा १९, मधेशमा १५ र कर्णाली प्रदेशमा ३ जनामा कोभिड संक्रमण देखिएको छ।

स्वास्थ्य मन्त्रालयले दुबै रोगका लक्षण देखिएमा तुरुन्तै स्वास्थ्य संस्थाको सम्पर्क गर्न र सावधानी अपनाउन आग्रह गरेको छ।