सरकारको एकल प्रयासले नि:शुल्क शिक्षा र स्वास्थ्य उपलब्ध गराउन सम्भव छैन: मन्त्री पौडेल

नेपाल हेल्थ न्युज, काठमाडौं । स्वास्थ्य र जनसंख्यामन्त्री प्रदीप पौडेलले सरकार एक्लैले निःशुल्क स्वास्थ्य र शिक्षा उपलब्ध गराउन नसक्ने बताउनुभएको छ। उहाँले शनिबार काठमाडौंमा आयोजित एक कार्यक्रममा बोल्दै भन्नुभयो, शिक्षा र स्वास्थ्यमा सामुदायिक योगदानको आवश्यकता छ। सरकारले मात्र यसलाई सुनिश्चित गर्न असमर्थ छ।

मन्त्री पौडेलले राज्यको लगानी यस क्षेत्रको लागि अपर्याप्त रहेको र भविष्यमा यसमा महत्वपूर्ण वृद्धि हुने सम्भावना पनि छैन भन्नुभयो।

राज्यले अहिलेसम्म गरेको लगानी निकै सीमित छ, र आगामी समयमै यसमा थप ठूलो लगानी गर्न सक्ने अवस्था छैन, उहाँले स्पष्ट पार्नुभयो।

शिक्षा र स्वास्थ्यमा सुधारको लागि नागरिकको सक्रिय भूमिका र योगदान महत्त्वपूर्ण रहेको उहाँले उल्लेख गर्नुभयो। उहाँले थप्नुभयो, शहरी क्षेत्रमा केहि हदसम्म शिक्षा र स्वास्थ्यको गुणस्तरीय सेवा उपलब्ध भएपनि, ग्रामिण क्षेत्रका विद्यालय र स्वास्थ्य सेवाहरुमा विकल्पको अभाव छ।

पौडेलले ग्रामिण क्षेत्रका नागरिकलाई ध्यानमा राखेर स्थानीय स्तरमा शिक्षालय र स्वास्थ्य संस्थाहरुको स्थापना गर्ने महत्व  आवश्यकता प्रकट गर्नुभयो। ग्रामिण क्षेत्रमा स्थानीय लगानीमा शिक्षालय र स्वास्थ्य केन्द्र खोल्नु पर्छ, उहाँले भन्नुभयो।