१९ वर्षमुनिका क्यान्सर रोगीका लागि १ करोडभन्दा बढीका औषधिमा भन्सार छुट

नेपाल हेल्थ न्युज, काठमाडौं ।  नेपाल सरकारले १९ वर्षमुनिका बालबालिकामा देखिने क्यान्सर रोगको उपचारमा प्रयोग हुने औषधि र स्वास्थ्य सामग्रीको पैठारीमा पूर्ण भन्सार महसुल छुट दिने निर्णय गरेको छ।

राजपत्रमा प्रकाशित सूचनाअनुसार, स्वास्थ्य सेवा विभागको व्यवस्थापन महाशाखालाई युनिसेफ अन्तर्गतको जिपीएसिसिएम परियोजना कोषबाट निःशुल्क प्राप्त हुने अमेरिकी डलर ३ हजार ५१.६७ (झन्डै ४ लाख रुपैयाँ) र युरो ७९ हजार ८१३.६० (झन्डै १ करोड १३ लाख रुपैयाँ) बराबरको स्वास्थ्य सामग्रीको आयातमा उक्त छुट प्रदान गरिएको हो।

सरकारको यस निर्णयले क्यान्सर पीडित बालबालिकाको उपचारमा लाग्ने लागत घटाउने र समयमै औषधि उपलब्ध गराउन सहयोग पुग्ने अपेक्षा गरिएको छ।