वीरगन्जमा हैजा र झाडापखालाको प्रकोप नियन्त्रणतर्फ

नेपाल हेल्थ न्युज, वीरगन्ज । वीरगन्जमा फैलिएको हैजा र झाडापखालाको संक्रमण बिस्तारै नियन्त्रणमा आउँदै गएको छ। उपचारपछि घर फर्किने बिरामीहरूको संख्या बढ्दै गएको स्वास्थ्य अधिकारीहरूले जनाएका छन्।

पर्सा स्वास्थ्य कार्यालयका अनुसार, मंगलबार बेलुकासम्म ९३४ जना झाडापखालाका बिरामी अस्पतालमा भर्ना भएका थिए, जसमध्ये ८६२ जना निको भएर घर फर्किसकेका छन्। बाँकी ७२ जना अझै उपचाररत छन्।

हैजाको संक्रमण पुष्टि भएका १९३ जनामध्ये १८२ जना घर फर्किएका छन् भने ११ जनाको उपचार जारी छ। यो प्रकोप २८ साउनदेखि सुरु भएको हो, जब बिरामीहरू छिटफुट रूपमा देखिन थालेका थिए। तर पछिल्लो सातादेखि संक्रमणको दर तीव्र भएको छ। हैजाको वास्तविक स्रोत भने अझै पत्ता लाग्न सकेको छैन।