जेनजी आन्दोलनमा घाइतेको उपचार निःशुल्क गर्न स्वास्थ्य मन्त्रालयको निर्देशन

नेपाल हेल्थ न्युज, काठमाडौँ । जेनजी आन्दोलनमा घाइते भएकाहरूको उपचार अब संघीय अस्पतालमा निःशुल्क हुने भएको छ। स्वास्थ्य तथा जनसङ्ख्या मन्त्रालयले मातहतका सबै संघीय अस्पतालहरूलाई शुल्क नलाग्ने गरी उपचारको व्यवस्था मिलाउन निर्देशन दिएको हो।

स्वास्थ्य मन्त्री प्रदीप पौडेलले मन्त्रालयस्तरीय बैठकपछि घाइतेलाई तत्काल प्रभावबाट निःशुल्क उपचार उपलब्ध गराउन अस्पताल प्रशासनलाई आदेश दिएका हुन्।

मन्त्री पौडेलले आन्दोलनका क्रममा घाइते भएका नागरिकलाई उपचारमा कुनै अवरोध नआओस् भन्ने उद्देश्यले यस्तो कदम चालेको बताउनुभएको छ ।

मन्त्रालयले घाइतेलाई उपचारका क्रममा एम्बुलेन्स सेवामा सहज पहुँच सुनिश्चित गर्न समेत आह्वान गरेको छ। उपत्यकाभित्र सञ्चालनमा रहेका एम्बुलेन्सलाई प्रभावकारी बनाउन र अस्पतालबाट रिफर भएका बिरामीलाई अर्को अस्पतालमा समयमै पुर्‍याउने व्यवस्था गर्न निर्देशन दिइएको छ।

सरकारले आन्दोलनमा घाइते भएका नागरिकको जीवन रक्षालाई प्राथमिकतामा राख्दै अस्पताल प्रशासन, स्वास्थ्यकर्मी र एम्बुलेन्स सञ्चालकलाई सहयोगात्मक भूमिका निर्वाह गर्न आग्रह गरेको छ। हालजसम्म १४ जनाको निधन भइसकेको छ भने दर्जनौं घाइतेको विभिन्न अस्पतालहरुमा उपचार भइरहेको छ ।