मृतकको सम्झनामा राष्ट्रिय झन्डा आधा झुकाइयो

नेपाल हेल्थ न्युज, काठमाडौं। जेनजी अभियानद्वारा आयोजित प्रदर्शनका क्रममा ज्यान गुमाउनेहरूप्रति श्रद्धाञ्जली व्यक्त गर्न सरकारले आज बुधबार राष्ट्रिय शोक मनाइरहेको छ।

मृतकप्रति सम्मान स्वरूप आज देशभरका सरकारी कार्यालयहरू बन्द गरिएका छन् भने विदेशस्थित नेपाली नियोग तथा दूतावासहरूमा समेत सार्वजनिक बिदा दिइएको छ। साथै, राष्ट्रिय झन्डा आधा झुकाइएको छ।

जेनजी अभियानले भदौ २३ गते भ्रष्टाचारविरुद्ध, पारदर्शिता र सुशासनको मागसहित काठमाडौंमा प्रदर्शन गरेको थियो। त्यस क्रममा प्रहरी हस्तक्षेप हुँदा गोली लागेर १९ जनाको मृत्यु भएको पुष्टि भएको छ।

घटनापछि भोलिपल्ट, भदौ २४ गते, देशैभर विरोध प्रदर्शनहरू चर्किएका थिए। दुई दिनसम्म चलेको आन्दोलनमा प्रदर्शनकारी र सुरक्षाकर्मी दुबै पक्षबाट गरी ७२ जनाले ज्यान गुमाएका थिए। साथै, प्रदर्शनका क्रममा विभिन्न सरकारी तथा निजी सम्पत्तिहरूमा क्षति पुगेको थियो।