गोली लागेका युवाको मागः उपचार मात्र होइन, भविष्यको ग्यारेन्टी पनि चाहिन्छ

नेपाल हेल्थ न्युज, काठमाडौं ।  जेन–जी आन्दोलनका क्रममा गोली लागेर घाइते भएका युवाको पीडा अझै गहिरो छ । शरीरमा लागेको घाउ निको पार्ने संघर्षसँगै उनीहरू भविष्य र उपचार खर्चको चिन्तामा छन् ।

भदौ २३ गते नयाँ बानेश्वरमा गोली लागेका बझाङका १८ वर्षीय सुनील थापा हाल शिक्षण अस्पताल महाराजगञ्जमा उपचाररत छन् । गोलीले उनको कम्मर हुँदै शरीरभित्र गहिरो क्षति पुर्‍याएको छ ।

चिकित्सक टिमको तत्काल शल्यक्रियाले ज्यान बचाए पनि फेरि अर्को शल्यक्रिया आवश्यक पर्ने अवस्था छ । उच्च शिक्षा अध्ययनका लागि जापान जाने तयारीमा रहेका थापा अहिले अस्पतालको शय्यामा पल्टिँदा घाउ र भविष्यको चिन्ताले सताइरहेका छन् । उनी भन्छन्- 'खर्च अहिले सरकारले हेर्ला तर फलोअप उपचार र भविष्य कसरी सम्भाल्ने भन्ने चिन्ता छ ।'

त्यस्तै, सिन्धुपाल्चोकका २८ वर्षीय रवि भण्डारीलाई महाराजगञ्ज चोकमा गोली लागेको थियो । राइड सेयरिङ गर्दै आएका भण्डारीले घाउसँगै मुलुकको भविष्यप्रति चिन्ता व्यक्त गरे । उनी भन्छन्-'भ्रष्टाचार र बेथितिले मुलुक बिरामी बनेको छ । त्यसलाई अन्त्य गर्न लड्दा हामी घाइते भयौँ । सहिदको बलिदान र हाम्रो रगत खेर नजाओस् ।'

मकवानपुर, कुलेखानीका २३ वर्षीय सञ्जय घिसिङ पनि आन्दोलनकै क्रममा गोली लागेर घाइते भएका छन् । उनको हातमा छर्राले बनाएको घाउमा सङ्क्रमण बढेको छ । निरन्तर फलोअप उपचार आवश्यक पर्ने बताए पनि उनी खर्च जुटाउने चिन्तामा छन् ।

यसैबीच प्रधानमन्त्री सुशीला कार्की, गृहमन्त्री ओमप्रकाश अर्याल, अर्थमन्त्री रामेश्वर खनाल र ऊर्जामन्त्री कुलमान घिसिङलगायतले घाइतेको अवस्थाबारे जानकारी लिएर प्रभावकारी उपचारका लागि निर्देशन दिएका छन् ।

सञ्चार तथा सूचना प्रविधिमन्त्री जगदीश खरेलले शुक्रबार महाराजगञ्जस्थित शिक्षण अस्पताल पुगेर घाइते भेट्नुभयो । उहाँले युवाको बलिदान खेर जान नदिने प्रतिवद्धता व्यक्त गर्दै भन्नुभयो-'तपाईंहरूको स्वास्थ्य अवस्था बुझ्न आएको हुँ । तपाईंहरू निको हुनुहोस्, हामी सबै मिलेर बिरामी मुलुकलाई निको पार्नुपर्नेछ ।'

मन्त्री खरेलले घाइतेको उपचारमा समस्या नभएको र अवस्था सुधारउन्मुख रहेको जानकारी दिँदै सरकार घाइतेलाई आवश्यक सबै प्रकारका सहयोग गर्ने प्रतिबद्धता जनाउनुभयो । घाइते र अभिभावकहरूले भने भविष्यमा निरन्तर हुने उपचार र जीवनपार्जनका लागि दीर्घकालीन सरकारी सहयोगको माग गरेका छन् ।