दशैँ–तिहारमा पनि अस्पताल सेवा नियमित, स्वास्थ्य मन्त्रालयको निर्देशन

नेपाल हेल्थ न्युज, काठमाडौं । स्वास्थ्य तथा जनसङ्ख्या मन्त्रालयले दशैँ, तिहार र छठजस्ता चाडपर्वका लामो बिदामा पनि अस्पतालको सेवा सञ्चालन गर्न निर्देशन दिएको छ ।

मन्त्रालयका सहसचिव एवं प्रवक्ता डा. प्रकाश बुढाथोकीले  एक विज्ञप्ति जारी गर्दै बिरामीलाई लामो समय पर्खनुपर्ने अवस्था आउन नदिन स्वास्थ्य सेवा निरन्तर गर्ने व्यवस्था मिलाउन सम्बन्धित अस्पतालहरूलाई निर्देशन दिनुभएको हो ।

विज्ञप्तिमा मन्त्रालयले उपलब्ध जनशक्ति र स्रोत साधनलाई व्यवस्थित र प्रभावकारी रूपमा प्रयोग गरी नियमित सेवा, अत्यावश्यक सेवा, इमर्जेन्सी तथा शल्यक्रिया सेवाहरू बिदाको दिनमा पनि सदाझैँ सञ्चालनमा राख्न अनुरोध गरेको छ ।