कात्तिक २० र २१ गते राष्ट्रिय भिटामिन ‘ए’ तथा जुकाको औषधि खुवाउने अभियान

नेपाल हेल्थ न्युज, काठमाडौं । सरकारले आगामी कात्तिक २० र २१ गते देशभर राष्ट्रिय भिटामिन ‘ए’ तथा जुकाको औषधि खुवाउने कार्यक्रम सञ्चालनहुने भएको छ । स्वास्थ्य सेवा विभागअन्तर्गत परिवार कल्याण महाशाखाले आर्थिक वर्ष २०८२, ८३ को पहिलो चरणको यस राष्ट्रिय कार्यक्रम ती मितिमा सञ्चालन गर्ने निर्णय गरेको हो।

 भिटामिन ‘ए’ र जुकाको औषधि खुवाउने मिति परिमार्जन

परम्परागत रूपमा यो कार्यक्रम हरेक वर्ष कात्तिक २ र ३ गते र वैशाख ६ र ७ गते गरी दुई चरणमा सञ्चालन हुँदै आएको थियो। तर यस वर्ष कात्तिक २ र ३ गते तीहारको लक्ष्मीपूजा परेकाले मिति परिमार्जन गरिएको हो।
स्वास्थ्य सेवा विभागका परिवार कल्याण महाशाखाका निर्देशक डा। विवेककुमार लालका अनुसार, असोज २० गतेको सचिवस्तरीय बैठकले उक्त कार्यक्रम कात्तिक २० र २१ गते सञ्चालन गर्ने निर्णय गरेको हो। “धार्मिक पर्वको कारण अभिभावक र स्वास्थ्यकर्मी दुबै व्यस्त हुने भएकाले व्यावहारिक रूपमा मिति सारिएको हो,” डा. लालले बताउनुभयो। उहाँका अनुसार, दोस्रो चरणको कार्यक्रम भने निर्धारित मिति — वैशाख ६ र ७ गते — मै सञ्चालन हुनेछ।

२७ लाख बालबालिकालाई भिटामिन ‘ए’, २४ लाखलाई जुकाको औषधि

सरकारले यस अभियानमार्फत पाँच वर्षमुनिका करिब २७ लाख बालबालिकालाई भिटामिन ‘ए’ र २४ लाख बालबालिकालाई जुकाको औषधि ९डिवर्मिङ ट्याब्लेट० खुवाउने लक्ष्य लिएको छ।

यसै क्रममा, छ महिनाभन्दा माथिका बालबालिकालाई ‘बालभिटा’ पोषणयुक्त आहार पनि वितरण गरिनेछ।
डा. लालले अभिभावकहरूलाई तोकिएको समयमा घर नजिकैको खोप केन्द्रमा बालबालिकालाई लगेर भिटामिन ‘ए’ र जुकाको औषधि खुवाउन आग्रह गर्नुभएको छ।

कार्यक्रमको उद्देश्य

भिटामिन ‘ए’ ले बालबालिकाको दृष्टि, रोग प्रतिरोधात्मक क्षमता र वृद्धि–विकासमा सहयोग पुर्‍याउँछ।
त्यस्तै, जुकाको औषधिले बालबालिकामा देखिने आन्द्रा सम्बन्धी जुकाको संक्रमण, रक्तअल्पता र कुपोषण घटाउने उद्देश्य राखेको छ। नेपालमा यो कार्यक्रम सन् १९९३ देखि सञ्चालनमा आएको हो र यसले बाल मृत्युदर घटाउन उल्लेखनीय योगदान पुर्‍याएको विश्व स्वास्थ्य सङ्गठन (डब्लुएचओ) र युनिसेफले समेत मूल्याङ्कन गरेका छन्।

स्वास्थ्यकर्मीको तयारी

स्वास्थ्य सेवा विभागले हाल देशभरका स्वास्थ्य संस्था, खोप केन्द्र र स्वयंसेवकहरूलाई तालिम र आवश्यक सामाग्री वितरणको तयारी अघि बढाएको जनाएको छ। डा. लालका अनुसार, “कार्यक्रमका लागि पर्याप्त भिटामिन ‘ए’ क्याप्सुल र जुकाको औषधि उपलब्ध भइसकेका छन्, अब स्थानीय तहले कार्यान्वयन गर्ने तयारी अन्तिम चरणमा छ।”

मन्त्रालयको अपिल

स्वास्थ्य तथा जनसङ्ख्या मन्त्रालयले सबै अभिभावकलाई आफ्नो बालबालिकाको स्वास्थ्य सुरक्षाका लागि भिटामिन ‘ए’ र जुकाको औषधि अनिवार्य रूपमा खुवाउन आग्रह गरेको छ। “यो सानो पहलले हाम्रा बालबालिकाको स्वास्थ्यमा ठूलो फरक पार्छ,” मन्त्रालयले जारी गरेको सूचनामा उल्लेख छ।