बालबालिकालाई विद्यालय भर्ना गर्नुअघि आँखा जाँच गराउनुस्ः  डा.सन्दुक रुइतको सुझाव

नेपाल हेल्थ न्युज, काठमाडौं  । वरिष्ठ नेत्ररोग विशेषज्ञ तथा दृष्टि पुनर्स्थापना अभियानका अगुवा डा. सन्दुक रुइतले अभिभावकहरूलाई आफ्ना बालबालिकाको विद्यालय भर्ना गर्नु अघि अनिवार्य रूपमा आँखा जाँच गराउन सुझाव दिनुभएको छ।

विश्व दृष्टि दिवसको अवसरमा मंगलबार सार्वजनिक गरिएको भिडियो सन्देशमार्फत डा. रुइतले बालबालिकाको दृष्टि परीक्षणलाई “जीवनभरको दृष्टि सुरक्षाको पहिलो ढोका” भन्दै अभिभावकहरूलाई सचेत गराउनुभएको हो।

“बालबालिकालाई विद्यालय भर्ना गर्नु अघि एक पटक आँखा जाँच गराउँदा दृष्टि समस्या छ कि छैन भनेर प्रारम्भिक रूपमा पत्ता लगाउन सकिन्छ, र धेरै समस्या समयमै निको पार्न सम्भव हुन्छ,” डा। रुइतले सन्देशमा भन्नुभयो।

दीर्घ रोगीका लागि नियमित जाँचको आग्रह

डा. रुइतले विशेष गरी मधुमेह (डायबिटिज) र उच्च रक्तचाप (हाइपरटेन्सन) भएका बिरामीहरूलाई पनि नियमित रूपमा आँखा परीक्षण गर्न आग्रह गर्नुभएको छ। उहाँका अनुसार, मधुमेहका बिरामीले कम्तीमा वर्षमा एक पटक “फन्डस परीक्षण” अर्थात् आँखा फुलाएर भित्री भाग जाँच गराउनुपर्छ, जसबाट डायबिटिक रेटिनोप्याथी जस्ता रोगहरू समयमै पत्ता लगाउन सकिन्छ।

औद्योगिक र कृषिक्षेत्रका श्रमिकका लागि सावधानी

उहाँले रासायनिक पदार्थसँग सम्बन्धित उद्योग, कृषि तथा प्रदूषणयुक्त क्षेत्रमा काम गर्ने व्यक्तिहरूलाई आँखा सुरक्षाका उपाय अपनाउन सुझाव दिनुभएको छ। “यदि कुनै रासायनिक पदार्थ (केमिकल) आँखामा परेमा तुरुन्तै सफा पानीले राम्ररी पखाल्नुस् र नजिकको आँखा केन्द्रमा पुग्नुस्,” उहाँले भन्नुभयो। त्यस्तै, आँखा चोट लागेमा पनि समय नफाली नजिकको नेत्र अस्पताल वा नेत्र केन्द्रमा जाँच गराउन उहाँको आग्रह छ।

दृष्टि सुरक्षामा प्रारम्भिक जाँचको भूमिका

डा। रुइतका अनुसार, नेपालमा दृष्टि गुमाउने धेरै समस्या प्रारम्भिक जाँच र सचेतना अभावका कारण बढिरहेका छन्। बालबालिकामा कन्जेनाइट क्याटार्याक्ट, भेंगो, र रिफ्रेक्टिभ इरर (चस्मा लगाउनुपर्ने अवस्था) जस्ता समस्या समयमै पत्ता लागेमा पूर्ण उपचार सम्भव हुन्छ। उहाँले थप भन्नुभयो, “आँखा हाम्रो जीवनको प्रकाश हो। त्यो बचाउन थोरै सजगता नै पर्याप्त हुन्छ। अभिभावक, शिक्षक र स्वास्थ्यकर्मी सबै मिलेर बालबालिकाको दृष्टि जोगाउने अभियानमा जुट्न जरुरी छ।”

विश्व दृष्टि दिवसको सन्देश

हरेक वर्ष अक्टोबरको दोस्रो बिहीबार मनाइने विश्व दृष्टि दिवस मा यस वर्ष लभ योर आइर्ज एट वर्क भन्ने नारासहित विभिन्न देशमा सचेतना कार्यक्रम भइरहेका छन्। नेपालमा पनि विभिन्न नेत्र अस्पताल र स्वास्थ्य संस्थाहरूले निःशुल्क दृष्टि परीक्षण, सचेतना कक्षा र परामर्श कार्यक्रमहरू सञ्चालन गरिरहेका छन्। डा. सन्दुक रुइतको सन्देशले दृष्टि स्वास्थ्यलाई विद्यालय प्रवेशदेखि नै प्राथमिकतामा राख्नुपर्ने आवश्यकता पुनः स्मरण गराएको छ।