आज पनि बालबालिकालाई भिटामिन ‘ए’ खुवाइँदै

नेपाल हेल्थ न्युज, काठमाडौं । स्वास्थ्य सेवा विभागअन्तर्गतको पोषण शाखाले आज पनि देशभरका बालबालिकालाई भिटामिन ‘ए’ क्याप्सुल र जुकाको औषधि वितरण गर्दैछ।

शाखा प्रमुख लीलाविक्रम थापाका अनुसार, छ महिनादेखि ५९ महिनासम्मका बालबालिकालाई भिटामिन ‘ए’ खुवाइनेछ भने एक वर्षदेखि पाँच वर्ष उमेर समूहका बालबालिकालाई जुकाको औषधि दिइनेछ।

थापाका अनुसार, यस वर्षको दोस्रो चरणको भिटामिन ‘ए’ कार्यक्रम आगामी वैशाख ६ र ७ गते सञ्चालन हुने तय गरिएको छ। सो कार्यक्रम प्रभावकारी बनाउन करिब ५२ हजार महिला स्वास्थ्य स्वयंसेविका र १५ हजारभन्दा बढी स्वास्थ्यकर्मी परिचालन गरिएको छ।

सरकारले बालबालिकामा कुपोषण र अन्य स्वास्थ्य समस्या घटाउन (वि.सं. २०५०) देखि नियमित रूपमा भिटामिन ‘ए’ कार्यक्रम सुरु गरेको हो। त्यसपछि  वि.सं. २०५६ देखि जुकाको औषधि पनि नियमित रूपमा वितरण हुँदै आएको छ।