१८ वर्ष कम उमेरका जलनपीडित बालबालिकालाई उपचार पूर्ण रूपमा निःशुल्क

नेपाल हेल्थ न्युज, काठमाडौं । सुष्मा कोइराला मेमोरियल अस्पतालले हाल जलनको जोखिममा परेका १८ वर्षमुनिका बालबालिकालाई निःशुल्क उपचार उपलब्ध गराउने घोषणा गरेको छ।

अस्पतालका प्रशासन प्रमुख प्रफुल्ल शर्माका अनुसार आगो, तातो पदार्थ वा अन्य कारणले भएका जलनका घटनामा परेका बालबालिकालाई आवश्यक सम्पूर्ण उपचार खर्च अस्पतालले नै व्यहोर्ने व्यवस्था गरिएको छ। उहाँले गत वर्ष मात्र १४२ बालबालिकाले यो सुविधा पाएको जानकारी दिनुभयो।

अस्पतालका मेडिकल निर्देशक डा. सन्तोष भण्डारीले शल्यक्रिया, बेड सुविधा, ड्रेसिङ तथा औषधि–उपचारजस्ता सेवा बालबालिकालाई पूर्ण रूपमा निःशुल्क प्रदान गरिने बताउनुभयो।

जलन उपचारलाई मुख्य प्राथमिकता बनाएर सन् १९९७ मा स्थापना भएको यो अस्पतालले स्थापना कालदेखि अहिलेसम्म पाँच लाखभन्दा बढी जलन पीडितलाई उपचार सेवा दिइसकेको उल्लेख गरिएको छ।